Hnahthial Post | July 19, 2025, Hnahthial: School of Agricultural Sciences (SAS) Hnahthial chuan nimin (18 july) chawhnu khan an Auditorium-ah 3rd Batch result puanna leh thlahna hun buatsaihin Pu R.Lalnunzira, Director, Agriculture & Farmers' Welfare Deptt chuan khuallian niin a hmanpui a. Pass chhuak thate hnenah lawmpuina thuziak leh pawisa fai hlanin SAS tan Rs.10000 a hlan bawk a ni.
Ram leh hnam kal zelah Zirna ngaih pawimawh deuh deuh a tul thu sawiin Agriculture Director, Pu R.Lalnunzira chuan "School of Agricultural Sciences pawh hi kan ram leh hnam tan a hlu in kan ngaihhlut zual deuh deuh a tul a ni" a ti a. He institution-ah hian zir duh tam tak an awm thu leh zir chhuakte pawh an chhuanawm thin thu sawiin instructor-te indaih lohna avangin Principal leh Vice Principal te pawhin thahnem ngai takin class an la thin tih ni a a hriat thu leh fakawm a tih thu a sawi.
Ram in hma a sawn zel theih nan Agriculture lam chawikan deuh deuh a tul thu sawiin Agriculture Director chuan "Agriculture technology hi zuam sual hlauhawm tak a ni a, kan inchhiar zau a ngai a ni" tiin thiamna chu tih pun zel theih a nih thu a sawi a. Zirlai pass chhuak tharte chu an thiam tak tak leh tak tak loh chu a la lang chhuak dawn chauh tih sawiin hman tlak thiamna nei ngei tura intathriam zel turin a chah a ni.
SAS Hnahthial Principal hlui Pu B.Ramnunsanga, Joint Director, Agriculture & Farmers' Welfare pawhin Zirlai pass chhuak tharte a lawmpui thu sawiin an thil zir zawng zawngte chu hmang tangkai tur leh mahni veng leh khuaah mite rawn theih tura inbuatsaih zel turin a fuih bawk a ni.
School of Agricultural Sciences Hnahthial-ah hian Subject 11 kalpui mek niin Instructor 3 chauh an awm avangin Principal leh Vice Principal te pawhin an zirtir thin a ni.
3rd batch-ah hian trainees 30 awmin an vaiin an pass vek a. 1st Division-ah mi 7, 2nd Division-ah mi 21 leh 3rd Division-ah mi 2 an pass a ni. A pumpuiah Mark 88.56% hmutu Lalrinzuala, Kawrtethawveng, Mamit District chu pakhatna niin 86.76% hmutu B.Lalventluanga, Council veng, Lawngtlai chu pahnihna a ni a; T.Lalrammawia, Pukpui, Lunglei District chuan 84.99% hmuin pathumna a ni bawk.
He hun hi Pu C.Malsawmkima, Principal, SAS Hnahthial chuan kaihruaiin Capt. PC.Hmangaihsangzuala chuan Pathian hnena inhlanna hunserh a hmang a. Dr.Evangeline Pari, SAS Instructor chuan result puanna hun leh Certificate hlanna hun kaihruaiin mi hrang hrangin thu an sawi bakah Pi Mary Lallawmkimi, Vice Principal, SAS Hnahthial chuan lawmthu sawiin hun a khar a ni. Pass chhuakte lawmpuina leh thlahna zanriah kil ho nghal a ni bawk.
School of Agricultural Sciences Hnahthial hi kum 1981 khan Integrated Training Centre (ITC) tiin din a ni a. Agriculture leh a kaihhnawih kum 2 course zirna kalpui niin Basic Agriculture Training (BAT) certificate pekchhuah thin a ni. Kum 2020 khan School of Agricultural Sciences (SAS) ti a hming thlak niin Diploma course ah hlan kai a ni.
Tags
News