Hnahthial Post | July 30, 2025, Aizawl: Vawiin khan Office of the Registrar, Cooperative Society buatsaihin International Year of Cooperatives - 2025 hnuaia hmalakna peng pakhat ‘Thisen Pek Runpui’ chu RCS Office, Babutlang-ah neih a ni a. Pu P.C. Vanlalruata, Co-operation Minister chuan khuallian niin hun hi a hmanpui a, Pu Amit Sharma, Secretary, Cooperation Department chu khual zahawm niin Pu John LT Sanga, Registrar, Co-operative Societies chuan inkhawm a kaihruai a ni.
Minisiter P.C. Vanlalruata chuan khawvel nuam zawk leh boruak tha zawk siama, midangte tana luanchhuah chu Co-operative thil tum pawimawh tak a nih thu sawiin UNO pawhin a ngaih pawimawh avangin kum 2025 pawh International Year of Cooperatives (IYC) tia a puan hial thu a sawi a. Thisen pek pawimawhzia sawiin ‘thisen chu mihring nunna bul leh midangte nena inkungkaihna thuk tak lantirtu a ni’ a ti a. ‘Thisen pek chu IYC thil tum nen pawh thil inhmeh tak niin mite tana malsawmna nih theihna leh mi tam tak nun chhan theihna a nih avangin thil intihhmuh chi tak a ni’ a ti bawk.
Khual zahawm Pu Amit Sharma, Secretary, Cooperation Department pawhin thu sawiin thisen pek runpui neih a ni chu lawmawm a tih thu a sawi a, Department hrang hrangte tan pawh thil intihhmuh chi tak niin District tinah leh hmun kilkhawr zawkahte pawh nasa zawka kalpui zel chi nia a hriat thu a sawi bawk.
Pu John LT Sanga, Registrar, Co-operative Societies Cooperative Societies hnen atangin Mizorama hmalakna hrang hrangte ngaihthlak a ni a. Tun dinhmunah thalai tam zawkten Co-operative pawimawhna an hriat theih nan, College leh University zirlaite tan, ‘Mizoram hmasawn nan Co-operatives Society’ tih thupui hmanga Essay inziahsiakna tur buatsaih mek a nih thu leh lawmman pakhatna Rs 50,000, pahnihna Rs 30,000, pathumna Rs 20,000 leh mi panga tan Consolation Prize Rs 5,000 theuh a nih tur thu a sawi bawk.
Vawiina thisen pek runpuiah hian, Cooperation Department leh a hnuaia Society hrang hrang atangin thisen pe tura inpe mi 83 an awm a ni.
Vawiin hun hmannaah hian Dr. C. Zohmingliani, HOD, Blood Bank, Civil Hospital, Aizawl te, Pu H. Dolianbuaia, Joint Secretray, Co-operation Department leh sawrkar mi pawimawh dangte bakah, Co-operative Society leh Federation hrang hranga Chairman leh member thahnem tak an tel a, Pu K. Lalduhawma, Joint Registrar, RCS-in lawmthu sawia inkhawm a khar hnuin thisen pek runpui hi neih zui nghal a ni.
Tags
News