Hnahthial Post | July 30, 2025, Aizawl: Vawiin khan Chief Minister Pu Lalduhoma hovin CM Conference Hall-ah Japan International Cooperation Agency (JICA) sum hmanga sak tur Mizoram State Super Specialty Cancer & Research Centre chungchang sawiho a ni.
Mizoram hi India rama cancer hmuh chhuah tamna ber (highest incidence) a ni a, kum tin India ramah mihring nuaih khat zelah mi 98.5 hi cancer vei thar an nih laiin Mizoramah chuan mihring nuaih khat zelah mi 189.7 ten an vei thar thin. Cancer tuar dam lo, enkawl tura phai lama refer pawh an tam thin a, sawrkarin sum a seng hnem thin hle. Mizoram dinhmun hi India ram pum nena khaikhinin a dangdai bik leh zel a, India rama cancer langsar pangate indawt dan chu Hnute, Chawkawng, Cervix, Chuap leh Esophagas a ni a, a hmasa pathumte hi a dapchhuahna (screening) tur sum central fund a awm a. Mizorama cancer langsar pangate indawt dan erawh chu Esophagus, Pumpui, Chuap, Hnute leh Cervix te an ni. Central screening fund hman theih lohna pathumah cancer kan vei nasa bik tihna a ni.
Hetiang dinhmuna ding kan nih lai hian Comprehensive Cancer Centre, Cancer tuartute enkawlna hmun bik kan la nei si lo va. Mizoram State Super Speciality Cancer & Research Centre din hi a tulin sawrkar chuan a hria a. Zemabawk, tuna cancer hospital ram chu tinzawn a ni.
A sakna tur sum hi JICA loan beisei niin, Rs 700 cr senga din tum a ni a, chung zinga Rs 560 Cr chu loan puk tur a ni. DPR hi Public Health Foundation India ten an siam a, kum 2023 February thlaah khan Loan Agreement hi Government of India leh JICA lam ten an ziak a. Loan interest rate hi 1.5% a ni a, kum 2033 atanga rulh tan tur a ni ang.
Ruahman danah chuan he centre ah hian cancer hospital building, nuclear medicine block leh staff quarters te sak an ni ang a. Equipment lamah hian PET scan/SPECT Scan, MRI 1.5 Tesla, CT Scan 128 Slices, PACS, RT-PCR/NGS te leh a dangte a awm ang. Chu bakah a thawktute buatsaihna lam te, cancer chungchang zau taka mipuite hnena zirtirna kalpui thlengin a awm.
Project hi hlawm hrang hranga thendarh a nih avangin a indawta kalpui a ngai a. Project Management Consultant atan Mukesh & Associates - Oriental Consultants Global Co, Ltd ruat an ni a, Soft Component leh Capacity Building kalpui turin Nippon Koei India Pvt ltd thlan an ni.
Vawiina meeting hian hnathawktu tur company tha leh rintlak ngei thlan chhuah a nih theih nan hmalak zui dan tur a ruahman a. A bawhzui tura ruatten a ranglamin meeting an ko leh ang.
Meetingah hian Pu TBC Lalvenchhunga, Adviser to CM, Pu H. Lalengmawia, Commissioner & Secretary, H&FW leh Health Department Official pawimawh te an tel a ni.
Tags
News