Hnahthial Post | July 31, 2025, Hnahthial: Mizoram sorkarin Myanmar buaina avanga Mizoram-a rawn raltlante chhinchhiah a, an mitnaute thlalak sak vek tura ruahmanna a siam angin Hnahthial District Level Committee on Displaced Persons hmalakna in vawiin atang khan Hnahthial District chhung, Thingsai khuaah Biometric Enrollment of Displaced Persons kalpui tan a ni a, a tah tawlin khaw dangah pawh kalpui chhunzawm zel tura ruahmanna siam a ni.
Hnahthial District Level Committee on Displaced Persons chuan Biometric Enrollment of Displaced Persons buaipui tur Nodal Officer atan Hnahthial Sub Divisional Police Officer (SDPO) a ruat a. SDPO hmalakna in Bawrhsap Office atangin Pu Francis K. Lallianmawia leh dealing staff, SP office atangin Pu Gilbert Lalchhandama te chu Thingsai-ah hian an kal a ni. Myanmar raltlante biometric enrollment hi Thingsai tlangdungah buaipui hmasak a ni ang a, an zawh hunah hian hmundangah neih chhunzawm zel a ni ang.
Bawrhsap Office chhinchhiah danin tun dinhmunah hian Hnahthial District chhung khaw sawm hnih (20)-ah Relief Camp sawm pathum (13) leh mi in luah Myanmar raltlan mihring za sarih leh pakhat (701) an awm mek a. Thingsai-ah hian tam berin mi zahnih sawmthum (230) an awm a, raltlan zingah hian puitling zali sawmthum paruk (436) ( mipa za sawmkua pariat (198) leh hmeichhia za hnih sawmthum pariat (238) ) bakah naupang kum tling lo zahnih sawmruk panga (265) an awm mek bawk a ni.
Tags
News