PWD Minister-in National Highway-6 thawmthat hna kalpui mek a enpui; mipui harsatna zualpui sutkian a nih thuai theih nan theihtawp chhuah mek a ni

Hnahthial Post | July 31, 2025, Aizawl: Vawiin khan Pu Vanlalhlana, Minister, Public Works Department chuan National Highway - 6, Sairang - Buichali - Kawnpui inkar kawng thawmthat hna kalpui mek chu a hmun ah kalin a endik a. Sports & Youth Services Minister Pu Lalnghinglova Hmar leh Pu Lalchhuanthanga, MLA-te chuan PWD Minister hi tawiawmin Er. H.Zoramliana, E-in-C, Er. David Sapzova, CE (Roads), PWD-a thawktute leh Kawnpui leh Khamrang khawtlang hruaitute an tel bawk a ni.

PWD Minister Pu Vanlalhlana chuan Mizoram chak lakluhna kawngpui pawimawh tak Kawnpui leh Sairang inkar a that tawk loh avanga harsatna thlengte sutkian a nih thuai theih nan Sawrkarin ruahmanna a siam thu leh kawng siamthat hna pawh ngawrh taka kalpui mek zel a nih thu a sawi a. Kawng thawmthat hna chak leh sawt zawka kalpui a nih theih nan Minister leh MLA te'n nitin an vilpui bakah PWD hotute'n a hmunah riahchilha an vil thu sawiin, Mizoram tana kawng pawimawh tak a nih avangin lirthei tana tlan tlak leh nuama siam vat a tul a ni, a ti a. PWD leh NHIDCL hmalakna tichak tura khawtlang hruaitute, tlawmngai pawl hrang hrang, lirthei hmanga eizawngtute leh lirthei khalhtute inpekna leh tawiawmnaah lawmthu a sawi a. He kawng siamthat nana Sawrkar, khawtlang leh pawl hrang hrang hmalakna leh inpekna rah duhawm tak hmuh thuai beisei a nih thu a sawi bawk.

Sairang leh Kawnpui inkar kawng thawmthat hna hi Section pathuma then niin Section-I hian Siarang atanga Buichali thleng a huam a. NHIDCL hnuaiah BR Goyal Infrastructure chuan a thawmthat hna hi thawkin Mizoram PWD chuan a tul apiangah khawl leh hmanruate nen an pui reng bawk a ni. Section-II hian Khamrang atanga Kawnpui-Aizawl peng thleng a huam a, Section -III hian Kawnpui - Aizawl peng atangin Kawnpui khaw chhung thleng a huam bawk a ni.

Heng section pathum vil hian PWD atangin Er. Eddie C.Zothansanga, Superintending Engineer, Highway Circle-I, Executive Engineer 2, SDO leh JE te'n a hmunah an riahchilh a. Kawng thawmthat nana hmanraw pawimawh tak, lung lak khawmna kawngah harsatna a awm tawh loh thu thawktute hian an tarlang a. Niminah lung trip 152 hman a nih thu leh lirthei tang hnuk chhuak turin kawng chhe zual laiah duty siam a nih thute tarlan a ni a. Kawng thawmthat hna chak taka kalpui a nih rualin ruah sur leh lirthei lian tlan an thahnem avangin duh anga hnathawh a sawt theih loh thu thawktute hian an sawi bawk a ni.