Hnahthial Post | July 3, 2025, Aizawl: Higher & Technical Education Minister Dr. Vanlalthlana chuan nimin (2 July) chawhnu khan Mizoram State University dinna tur Government Aizawl West College Campus, Luangmual a tlawh. Minister hi Rev. Dr. K. Thanzauva, Education Consultant chuan a ṭawiawm a ni.
Dr. Vanlalthlana chuan mahni state puala university neih tur chu kan hnam rohlu a nih dawn avangin duat tak leh ṭhahnem ngai taka enkawl chhoh a ngai tih sawiin, Govt. Aizawl West College thuneitute chu a hmun nghak an nih anga ṭhahnemngaia theihtawp chhuah turin a chah a. Mizoram State University din turin sawrkar hmasain bul an lo ṭan tawh thu leh chak taka nawr zuia lo par chhuak ta a nih thu sawiin, he university hi tu ta bil mah ni lovin zofate zirna inpui tur a nih thu a sawi a ni.
Mizoram State Assembly-in Mizoram University Bill 2025 a pass hnuah Sawrkar chuan chak taka hma lain, tunah hian a hmun turte laiha sak mek a ni a. College hrang hrangte hman ṭangkai phawt hnuah, hengte hi school hrang hranga siam chhoha University tura ruahmanna siam a ni.
Government Aizawl West College, Campus hmun pawh hi administration ṭhut hmun atana buatsaih mek niin, he hmun a tlawhnaah hian Prof. C. Lalthlengliana, Principal, Government Aizawl West College, Head of Department hrang hrang, zirtirtute leh non-teaching staff te’n an lo dawngsawng a ni.
Mizoram Universiy dinna tur hian SASCI aṭangin cheng vaibelchhe 30.4 hmanga bul ṭan a ni a, sum mamawh dang hi sawrkar laipui-ah H&TE Minister hian a thlen tawh bawk a ni.
Tags
News