Hnahthial Post | July 3, 2025, Hnahthial: Nimin (2 July, 2025) khan Hnahthial DC Conference Hall-ah sawrkar hmalakna - Bana Kaih scheme hnuaia kum 2024-25 chhung atana thlai thar lei hralh kharna hun hman a ni a. Kharna programmme-ah hian Bawrhsap leh District Agricultural Marketing Committee (DAMC) Chairman ni bawk, Pi K. Vanlalruati chuan khuallian niin DAO leh DAMC Member Secretary ni bawk, Pi Julie Zodinpuii hnen atangin Hnahthial District chhunga sawhthing lak khawm leh hralh chhuah a nih dan kimchang (technical report) ngaihthlak a ni.
Bawrhsap chuan loneitute chawikan nan a buatsaih, thlai thar lei leh hralh chhuah thawh khatna kan zo fel thei chu lawmawm a tih thu a sawi a. Sawrkar flagship scheme, Bana Kaih hnuaiah thlai chi dang dang awm mah se tun dinhmunah chuan sawhthing hi Hnahthial District chuan an buaipui bik thu a tarlang a. Sawhthing chu chhungtin ten eitur sawngbawl nana an hman thin, hnam dangte pawhin masala leh bawlhhlo siam nana an thil hman ber te zinga mi a nih thu sawiin a pawimawhna a tarlang a. Tun dinhmunah chuan a thawh khatna chauh kan la zawh rih thu sawiin Loneitute chu tha thlah lova tan la zel turin a fuih nghal a. Sawrkarin loneitute ei leh bar leh intodelhna kawnga a puihna hi kum thar lamah pawh felfai zawka chhunzawm leh besei a nih thu a sawi bawk. Sawhthing mai ni lovin thlai dangte pawh buaipui chhoh zel an beisei thu sawiin phurna thar leh rilru thar nen loneitute chu hna thawk chhunzawm zel turin a sawm a ni.
Kum 2024-25 chhungah thlai thar lei leh hralh dan Technical report chu DAMC Member Secretary hnen atangin ngaihthlak a ni a. Hnahthial District tan DAMC Member sawm panga (15) an awm thu tarlangin khaw sawmhnih pasarih (27) ah Primary Collection Centre (PCC) hawn a nih thu a tarlang a. Lei hmasak berna, Phase -1 ah khan PCC ten an chhunkhawmna hmun tur, Secondary Collection Centre (SCC) panga (5) an awm thu sawiin chungte chu - Hnahthial, Cherhlun, Chhipphir, Darzo leh Tarpho te an nih thu a tarlang a. Phase -2 ah chuan Darzo leh Tarpho SCC te chu khar niin Hnahthial SCC ah chhun luh an ni a. Pangzawl SCC hawn thar niin hetah hian Pangzawl, Rawpui leh Thiltlang PCC ten an chhung khawm a ni.
Phase-1 ah Sawhthing Quintal 4669.15 lei niin phase-2 na ah allotment, quintal 9650 aia tam, quintal 11703.20 lei a nih thu tarlan a ni a, Sawhthing hi Sawrkar-in kg ah cheng 50 zelin a lei a ni. Phase 1 leh 2 a sawhthing lei tawh zat belhkhawm hi quintal 16,372.35 niin Sawrkar-in a hralhna man atanga a hmuh let paih hnuin sawhthing leina atana sum senso tur zat hi a vaiin Rs.671,80,444 a chhut a ni a. Phase -2 a Sawhthing leina man hi invoice la upload kim loh avangin loneitute hnenah pek chhuah a la ni lova, Invoice upload hun hi July ni 15 thleng hawn a ni.
Technical report ngaihthlak zawh hnu hian a duh apiang tan thu sawina hun hawn a ni a. Pawl hrang hrang hruaituten Sawhthing lei leh hralh kalpui a nih dan chungchanga an vei zawngte sawina hun atan an hmang a ni.
He kharna programme hi Addl DC, Pu Zothanmawia Khiangte chuan kaihruaiin DVO, Pu C.Sanghluna chuan lawmthu sawina in hun hi a khar a ni. Head of Office te bakah NGO hrang hrang hruaitute chu he kharna hunah hian an tel a ni.
Tags
News