Hnahthial Post | July 7, 2025, Hnahthial: Vawiin khan District Industries Centre Conference Hall, Electric Veng, Hnahthialah Commerce & Industries Department hnuaia mipuite tana hmathatna tur schemes hrang hrang awmte inhrilhhriatna hun hman niin Bawrhsap, Pi K. Vanlalruati chuan khuallian niin a hmanpui a. He hunah hian Raising and Accelerating MSME Performance(RAMP) atangin Angel Business-te chuan hamthatna dawng thei kawlhawmte hnenah schemes awmzia inhrilhhriatna hun an hmang a ni.
He hun hi DCIO, Pu HB Lalremmmawia chuan kaihruaiin Bawrhsap chuan thusawina hun a hmang a. Hnahthial mipuite tana thil tha tak mai chhawpchhuah a ni chu lawmawm a tih thu sawiin Mizoram pumpuia RAMP awareness neih hmasak berna hmun atan Hnahthial thlan a ni chu DCIO leh a tawhpuite zar a ni tiin an hmalaknate fakawm a tih thu a sawi a. C&I hian Sawrkar laipui Ministry pali nena zawmpui neiin sawrkar hmalakna pawimawh tak mai Bana Kaih Policy-ah chanvo pawimawh tak an neih thu a tarlang a. Mipuite chu an tana hamthatna awm thei tur scheme chi hrang hrangte chu ngaihven a, midang pawh lo hrilhhre zel turin a chah a. Bul tan tawh chuan teihtawp chhuah tura fuihin he awareness programme hi District intodelh kan nih phahna kawng pawimawh tak a nih ngei a beisei thu a sawi a ni.
He Awareness programme-ah hian schemes hrang hrang - UNNATI, PMFME, PMEGP, Handloom Textiles and Handicrafts hnuaia schemes awmte baka MSME hnuaia schemes hrang hrang awmte chu inhrilhhriatna hun, Pu Christopher Lalbiaknia, Consultant, Angel Business hova neih a ni a. Pu R. Lalmalsawma,LDM, Lead Bank Office , Lunglei hovin Financial Literacy Campaign hnuaiah sum leh pai vawn dan leh hriat tur tul inzirtirna neih a ni bawk.
He hunah hian sawrkar official-te bakah pawl hrang hrang leh Self Help Group (SHG) thenkhatte an tel a ni.
Awareness Programme hi District hrang hrangah kalpui tura ruahmanna siam a ni.
Tags
News