Minister Pu Lalnghinglova Hmar-in sawrkar laipui hotu thenkhat hmu

Hnahthial Post | July 1, 2025: New Delhi-a cham mek Pu Lalnghinglova Hmar, Minister of State chuan vawiin khan Director General, Narcotics Control Bureau bakah Ministry of Finance hnuaia Department of Public Enterprises leh Ministry of Youth Affairs hnuaia Department of Youth Affairs Secretary te an office-ah a kawm a, Mizoram mamawh hrang hrang thlenin thawhho theihna lai te a sawipui.

Excise & Narcotics Minister Pu Lalnghinglova Hmar hian vawiin khan Pu Anurag Garg, Director General, Narcotics Control Bureau kawmin Mizoram a ruihhlo hluar do turin thawhho tha zawk neih a tul thu a thlen a. Myanmar ramri kaltlangin ruihhlo a lo lut nasa tih sawiin, intelligence-sharing leh thawktute training pek kawngah Mizoram Excise & Narcotics Department thuam chak a ngai tih a hrilh.

Mizoram Excise Minister ngenna angin Mizoram leh Northeast state danga Narcotics kaihhnawiha thawkte tan capacity building training an buatsaih tur thu DG, NCB chuan a sawi a. Aizawlah NCB Zonal Office hawng tura ruahmanna a awm mek thu a lo hrilh bakah Myanmar aṭanga ruihhlo lo lut do kawngah tun aia inhnaih leh inpawh zawka thawhho dan tur an sawi dun.

Sports & Youth Services Minister ni bawk Pu Lalnghinglova Hmar hi vawiin vek khan Dr. Pallavi Jain Govil, Secretary (Youth Affairs), Ministry of Youth Affairs and Sports nen pawh an inkawm a, Department of Youth Affairs hnuaia thalai hmasawnna kaihhnawih activity hrang hrang te chu Mizoramah nghah ve thin nise a duh thu leh, Mizoram pawn atanga thalai tam zawk hip thei turin Aizawlah Youth Hostel sak a ngaih thu a thlen. Youth Affairs Secretary chuan a theih anga hma an lak tur thu a sawi a ni.

Tourism Minister ni bawk Pu Tetea Hmar chuan Pu Moses Chalai, Secretary, Department of Public Enterprises (Ministry of Finance) pawh a kawm a. Mizoram chu state tê, budget pawh lian lo tak a nih avangin, hmasawnna hnathawh kawngah Central PSE te kaltlanga puihna awm theite an sawi dun a ni.

Pu Lalnghinglova Hmar hi nimin khan Dr. Rajendra Kumar, Secretary (Border Management), Ministry of Home Affairs nen ramria ruihhlo tawlh chungchanga thawhho theihna hrang hrang sawiin an lo inkawm tawh bawk a ni.