Hnahthial Post | July 1, 2025, Hnahthial: Mizoram hmun dang rualin nimin khan Mizo Hnam Run Hnahthial-ah Remna Ni 2025 lawmna hun buatsaih a ni a, MNF Gen.Hqrs atangin National Core Committee member Pu D.Thangliana Ex MLA leh Gen.Secretary Er.K.Lalsawmvela te chuan hmanpuiin India sorkar leh MNF inremna ziah chu a tu lam ve ve duhthusam ni lo mahse a hlut zia leh State dangte pawhin an awh zia an tarlang a ni.
Mizoram-ah remna a awm theihna tur atan Kohhran leh pawl hrang hrang, Political party-te an thawh hlawk thu sawiin Pu D. Thangliana, Ex-MLA chuan "MNF leh India sorkar inremna mai ni lovin Mizoram leh India sorkar inremna a ni" tiin MNF-te lawm bik tur anga ngaihna awm lo se a duh thu a sawi a, "MNF hi a lawm lo ber tur niawm zawk tak kan ni a, inremna thuthlung ziah te pawh kha kan duh ang diak diak a ni bik lo; independent lova lo haw kha hnam sipate tan thil chakawm a ni lo" tiin Pathian remruat avanga lo haw niin a hriat thu a sawi a ni
MNF leh India sorkar inremna avangin Mizoram chu UT atangin State a nih thu te, Mizoram University leh High Court kan neih theih phah thu te tarlang a, India danpui-ah Article 371 (G) dah belhin Mizo sakhua leh hnam dan-ah ram neitu nihna leh inhlanchhawn chungchangah te leh Inner Line Permit (ILP) chungchangah te hian Parliament-in lo pawm ngawt pawh nise Mizoram Legislative Assembly remtihna tel lo chuan hman theih a nih loh thu te sawiin "Mizo mipuite hian hengah hian Veto power kan nei a, mi thenkhatin sawihnawm viau mahse Mizo hnam tan thil tha tak tak a rawn hring chhuak a, a hlu hle a ni" a ti
MNF chu in surrender anga sawi awm thin mahse in surrender an nih loh thu Er.K.Lalsawmvela chuan sawiin "in surender leh in-remna hi thildang daih a ni a, in surrender tan engmah duh dan leh ham thatna an sawi ve theih lova an tlawm ringawt, MNF leh India sorkar chuan inremna an siam a, Memorandum of Settlement (MoS) a awm thlap" tiin MNF in Independent puanga Hnam Movement a kalpui avangin Mizo-ram chu thenawm State te angin hnam-dang ten tun thlenga an la chiah thuk loh thu a sawi bawk a ni
He hun hi Pu HC.Lalventluanga, Vice President, MNF West Block, South Tuipui A/C chuan a kaihruai a ni
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News