Hnahthial District Education Office Building thar hawn a ni

Hnahthial Post | July 1, 2025, Hnahthial: Vawiin tlai dar 2:30 khan Hnahthial District Education Office chu District Education Officer, Pu H.Sangthanga chuan a hawng a. Hawnna inkhawm hi DEO hovin Sub-Divisional Education Office leh District Project Office staff ten an hmang a ni.

District Education Officer, Pu H. Sangthanga chuan office a thawkte leh hmunpui lama hotute duhsakna zarah District Education Office thar, Hnahthial District tan hawn a ni thei ta chu lawmawm a tih thu a sawi a. DEO office chu August ni 3, 2022 khan hawn tan tawh ni mahse sum indaihlohna avangin office sak hna thawh tan lawk theih a nih loh thu a sawi a. Tun dinhmunah pawh sum indaihlo chunga an sa zo thei hi office thawktute inpekna zar a ni tiin he office hi Hnahthialin zirna lama hma a sawn phah ngei beiseina nen a hawng a ni.

Hawnna inkhawm hi Pu Nohro Chhuatlo, H/A, DEO office chuan a kaihruai a. SDEO, Pu S.Lalthanzuala'n hunserh a hman zawh hnuin Pu C. Lalzarliana, Dy DPC hnen atangin thusawi tawi ngaihthlak a ni a. Pu Joseph Zokunga, Headmaster, Govt. Electric Veng Middle School hnen atangin technical report ngaihthlak a ni bawk.

DEO office hawn thar hi Peniel Veng, DPC office bulah awmin 42ft x 24ft a zau a ni a. A sak nan hian cheng nuai 28 vel sen a ni. DEO office hian High School leh Higher Secondary School enkawlin tun dinhmunah hian Hnahthial District-ah Higher Secondary School sawm pakhat (11) an awm a. Chung zingah chuan Govt. School pakhat (1), Samagra Shiksha pahnih (2); Adhoc School pahnih (2); Lumpsum school pathum (3) leh Private school pathum (3) an awm a ni. High School hi sawmhnih pathum (23) awmin Govt. School sawm (10); Samagra Shiksha pahnih (2); Adhoc school paruk (6); Lumpsum school pathum (3) leh Private school pahnih (2) te an awm a ni.