Hnahthial Post | July 25, 2025, Hnahthial: Nimin khan DC Meeting Hall Hnahthial-ah Mizoram Sorkar Tourism Department in district tin a 'Narrating Mizoram: Tale of Our Land' Storytelling Competition buatsaih tura a tih Hnahthial District a buatsaih dan tur chhungchang ngaihtuahin thut khawm a ni a, he hun hi District Bawrhsap Pi K. Vanlalruati chuan a kaihruai a ni.
Meeting kaihruaitu Pi K. Vanlalruati, Bawrhsap chuan meeting koh a nih chhan sawi zauna a nei a, Mizoram Sorkar Tourism Department atanga 'Narrating Mizoram: Tale of Our Land' Storytelling Competition Hnahthial District chhunga huaihawt tum a nih dante hemi atana ruahmanna awm sa te a sawifiah a ni. Pu Zothanmawia Khiangte, Addl. DC pawhin hemi atana hriat tul hrang hrangte a sawi zau bawk.
Meeting chuan Storytelling Competition hi DC Conference Hall Hnahthialah July ni 30, 2025, chawhma dar 11:00-ah neih nise, Programme in-charge atan Pu Lawrence Lalhlanthara, SDC ruat a ni a, intihsiaknaah hian lawmman pakhatna in cheng sing khat leh certificate (Rs. 10,000) Pahnihin in cheng sang sarih leh certificate (Rs. 7,000) pathumnain cheng sang nga leh certificate (Rs. 5,000) dawng tura ruahman niin anni bakah he intihsiaka tel zawng zawngte hnenah Participation Prize (Certificate) hlan tura tih a ni. Chanvo leh mawhphurhna hrang hrang nei turte ruat fel nghal niin program pawh an duang fel nghal a ni.
He hunah hian Hnahthial Bawrhsap Office a Officer te, Judge tura ruat Pu HD. Lalpekmawia, Project Director, DRDO, Pu B. Lalrinliana, Director Rtd. leh Pu C. Zonunmawia Chanmari Hnahthial ve ve te an tel a ni.
Tags
News