School Education Department Quarterly Review Meeting vawi 4-na thukhawm

Hnahthial Post | July 5, 2025, Aizawl: School Education Minister Dr. Vanlalthlana hovin nimin (4 July, 2025) khan Department hnuaia hmalaknate thlirletna hun, Quarterly Review Meeting vawi 4-na chu SAD Conference Hall-I, Mizoram Secretariat-ah neih a ni a, Mizoram Education (Transfer & Posting) Rules, 2020 chungchangah July ni 18, 2025 hian Public Consultation Meeting nei tura ruahmanna siam a nih thu tarlan a ni.

Meeting-ah hian school syllabus-a spoken Hindi telh chungchangte, department inrelbawlna chherchhuan dan (administrative set-up) chungchangte, huam zau taka zirlai naupangte hmasawnna tehna Holistic Progress Card (HPC) chungchangte, pawl 8 chin hnuai lam elementary education-a textbook thar hman chungchangte, pawl 9 atanga Pawl 12 inkar secondary leh higher secondary education syllabus-a subject dah belh chungchangte leh district hrang hrang aṭanga thu rel tur lutte sawi ho a ni a. Heng bakah hian department ṭhat zawkna tura rawtna lut hrang hrangte sawi ho a ni bawk.

He hunah hian Mizoram Education (Transfer & Posting) Rules, 2020 chungchanga July ni 18, 2025-a Public Consultation Meeting neih tura ruahmanna neih a nih thu ngaihthlak a ni a. Draft rules hi School Education Department website aṭanga download theih a nih thu leh rawtna leh sawi duh nei tan July ni 11, 2025 thlenga MERC email, merc.mizoram@gmail.com-a theh luh theih a nih thu tar lan a ni.

Quarterly Review Meeting-ah hian common exam question kalpui dan tur chungchang ngaihthlak a ni a. Second term exam lo awm tur aṭanga kalpui ṭan tur niin, pawl 3 aṭanga pawl 8 zirlai zawng zawngte'n zawhna inang an chhan theih nan ruahmanna kalpui mek a nih thu sawi lan a ni.

School Education Department Quarterly Review Meeting-ah hian Education Consultant Rev. Dr K. Thanzauva, Mizoram Education Reforms Committee (MERC) Working Chairman Prof. Lalbiakdiki Hnamte, School Education Department hnuaia office peng hrang hrang - Secretariat, Directorate of School Education, Directorate of SCERT, MBSE, Samagra Shiksha hnuaia officer-te leh District Education Officer-te an tel a ni.