Hnahthial Post | August 5, 2025, Hnahthial: Agriculture & Farmers' Welfare Special Secretary, Pi Ramdinliani chuan nimin khan Hnahthial District tlawhin District Agriculture Office, School of Agricultural Sciences (SAS) leh Krishi Vigyan Kendra (KVK) te chu a tlawh a. Office-te chuan an hmalakna te hmuin an mamawhte an thlen a ni.
Pi Ramdinliani chuan DAO Office chu tlawh hmasa berin District Agriculture Officer, Pi Julie Zodinpuii chuan an staff dinhmun, an indaihlohna leh soil lab an mamawhna te a thlen a. Pi Ramdinliani chuan Agriculture Office changtlun zawk nan a theih ang tawka hma a lak tur thu a hrilh a. Block Agriculture Office (BAO) leh District Agriculture Office hmun khata awm chu fuh tawk lo a tih thu sawiin BAO chu S. Vanlaiphaiah dah a tha zawk ang em tih te an sawi ho va. Central lamin precision Agriculture kalpui an tum thu leh chumi atan chuan data dik tak neih a tul tur thu a sawi a. Chuvang chuan data siam chawp leh dik tawk lo chu lak a fuh dawn loh thu sawiin data lakkhawm hmangin Agriculture lamah hmalakna awmze nei leh mumal tak kalpui tum a nih thu a sawi bawk.
Loneitute tana siam, fertilizer, a hmanna tur ni lova hman a tam thu sawiin fertilizer hi drugs leh puakthei thil siam nan hman thin ni a an hriat thu a sawi a. Fertilizer hralh chhuah thenkhat chu Burma lamah tawlh lut in, fertilizer a awm, chemical thenkhat chu an lak chhuah thin thu leh chumi hmang chuan Methamphetameme siamchhuah na thin ni a an hriat thu a sawi a. Heng hi Mizoram chhungah vek rawn tawlh luh leh thin niin ram tan thil hlauhawm tak a ni a, chumi avang chuan fertilizer dealer te check that an ngaih thu leh a zuartute chuan a rate an tar em tih enfiah a, an tar loh chuan show cost notice pe thin turin Fertilizer Inspector chu a chah nghal a. NCORD thutkhawm leh hunah fertilizer hralh chhuah dan leh an hralh chhuahna ten an hman dan mumal taka chhui dan kawng lo dap tura a duh thu a sawi bawk a ni.
School of Agricultural Sciences tlawh bawkin zirlaite chu tunlai thiamna, Artificial intelligence leh Internet of Things te hmang tangkai turin a fuih a. Lo neih hrehawmna ber chu kut hnathawh hi a nih thu sawiin chumi chhawk tur chuan khawl hman dan hria a, hmang tangkai thiam turin a chah a ni.
Krishi Vigyan Kendra tlawhin Home Science-te, Agronomy leh Horticulture room-te bakah hmun hrang hrang a tlawh kual a. Pi Ramdinliani chuan Mizo thlai tharte mumal taka khar chhawn a, hralh chhuah a tulna te sawiin KVK hnuaia research hmang hian agriculture lamah eizawnna tha tak tak siam theih ni a a hriat thu a sawi bawk a ni. Senior Scientist and Head, Dr. Henry Saplalrinliana chuan KVK, Lunglei District, Hnahthial in a an hmalakna neih hrang hrangte a hmuh nghal bawk.
Special Secretary hi Pi K. Vanlalruati, Deputy Comissioner; Pi Lalremruati, Deputy Secretary, Agriculture Department; Pu C. Maldawngkima, Principal, SAS; Pi Rosalind Lallawmzuali, ADHO bakah officials hrang hrangten an tawiawm a ni.
Tags
News