Hnahthial Post | August 14, 2025, Kolasib: Vawiin khan Indian Council of Agricultural Research (ICAR) te chuan ‘Transforming Food, Land & Water System to Combat the Current Climate Crisis’ tih thupui hmangin One Day State Level Workshop chu ICAR Research Complex Kolasibah an huaihawta. He hun hi Pu Lalfamkima, Deputy Speaker, Mizoram Legislative Assembly chuan khuallian niin a hmanpui a ni.
He hunah hian Pu Lalfamkima chuan ICAR Programme-a khualliana an sawm chu lawmawm a tih thu sawiin, amah ngei pawhin hun rei tawh tak atanga a lo tlawh fo tawh thin ICAR hmuna khualliana a tang ta mai chu a lawmawm tak zet a ni a ti a. Deputy Speaker chuan kan ram leilungte kan enkawlna ah uluk leh duat taka kan thlah lo la kal zel turte tan kan ngaihtuahna sen a pawimawh hle a ni tiin, hemi kawngah hian ICAR Scientist-te chu thlai chin dan tha zawkte, lei tha leh tui heh lo zawnga loneih dante zirchianna neiin mipuite tan an thawhhlawk hle a ni a ti a. Hman deuhah chuan kan duh danin thlaite kan ching tawp thin a, amaherawhchu tunah chuan a bik takin Kolasib District-ah phei chuan Loneitute’n lo neih leh thlai chin dan tha zawk atana rawn tur Scientist tha tak takte an awm chu an hlawkpui hle tih a hriattheih a ni a ti.
Pu Lalfamkima chuan vawiina Line Department hrang hrang lo kalkhawmte chu Mizoram Sawrkarin Bana Kaih Policy a kalpui mekah ei leh bar tharchhuah kawngah ram a lo intodelh zel theih nan an theihna leh thiamnate tuai hriam zel turin a chah a. ICAR hmuna mithiamte’n zirna leh enchhinna an kalpui thinte chu hmang tangkaia chhawr zel turin a chah nghal bawk a ni.
He huna Khualzahawm Kolasib DC Pu Robert C. Lalhmangaiha pawhin thusawiin Pathian thil siam zinga ropui ber mihringte hian leilung enkawla, a hausakna haichhuaka tangkai taka hmang tura siam kan nih thu a sawi a. Mizorama Agriculture Research-na hmunpui Kolasib ICAR chu Mizoramin thlai leh loneih kawnga rahbi thar kan zawhzel theihna hmun pawimawh tak a nih thu sawiin, ICAR Kolasib a thawktute hnathawh chu fakawm a tih thu a sawi a ni.
Vawiin hunah hian Dr. Sunil Doley, ICAR Head of Regional Centre, Mizoram Centre Kolasib chuan inlawmna thu leh vawiin a an hun hmanna tur chungchang sawifiahna hun a hmang a. Programme hi thuang hniha then a ni a. Zing lamah Inaugural Programme hman niin chawhnu lamah Line Department hrang hrang kalkhawmte leh ICAR RC NEH Region atanga kalkhawmte chuan an awmna sik leh sa mila thlai chin dan tur chungchang leh thupui pawimawh dangte inzirtir nan hun an hmang a ni. He hunah hian thlai leh ran enkawl dan chungchanga ICAR Kolasiba mithiamte’n an zirchianna lehkhabu chu Khuallian, Pu Lalfamkima chuan a tlangzarh bawk.Vawina workshop neihna ah hian ICAR NEH Region leh Line Department-te bakah Kolasib District-a loneitu thahnem tak an tel a ni.
Tags
News