Mizoram mipui duh takte u,
CHIBAI
India ram zalenna ni vawi 79-na hun chhinchhiah tlak takah hian Mizoram mipuite chibai ka buk vek a che u. He hun pawimawh takah hian, zalenna kan neih theih nana ram tana theihtawp chhuahtu mi thahnem takte tawrhna leh inhlannate kan ngaihluin kan hre reng a ni. India ram puma he hun hman a nih rual hian kei pawhin ram tana mi huaisen, nakin zel thleng pawha min tiphura chakna min petute zahna ka lantir a ni.
Kan ram hian harsatna a tawh chang pawhin chak tak leh huai taka dingin a paltlang fo tawh thin a, tunhnaia Pahalgam, Jammu & Kashmir-a mi firfiakte chetna rapthlak takah pawh khan a lantir a ni. Firfiakte kut tuara thite kan hriat reng bakah an chhungte kan tawrhpui takzet a. Anmahni hriat reng nan tharum thawhna ang chi reng reng beihlet kawngah tha thlah lova beih zel a tum a ni. Hlawhtling taka Operation Sindoor beihpui thlak a nih theih nana ram hruaitu chhuanawm tak takte leh sipai huaisen tak takte hmalakna avangin lawmthu ka sawi a, hei hian kan ram chu ram inrelbawlna hran nei leh ram venhim kawnga theihtawp chhuah thin a nih zia a lantir a ni.
Ram thenkhatin sumdawnna kawngah India hrek tumin hma an la mek a. Khua leh tui tha kan nih angin kan ram thil siam chhuah hmang ngeia intodelhna 'Atmanirbhar Bharat' puitlin thei turin kan ram policy duante tha taka kan zawm a tul a. Khawtual thil siam ngeite kan hman uar hian ram sum leh pai dinhmun a siam tha a, intodelhna tura hmalakna a chawilar a ni. Hei hi ram hmasawn nana kan zavaia thupui thlan leh inghahna ni se a duhawm hle ang.
India rama ziak leh chhiar thiam vekna State hmasa ber dinhmun Mizoramin a hauh hi ka lawmpui takzet a. He mellung pawimawh tak hi thiamna leh hmasawnna kawnga kan tanrualna rah liau liau a ni. He hlawhtlinna hi zirna kawnga hmasawnna chak leh tha nei turin chhawmnung zel ila, kan zirlaite'n kawng hrang hranga hlawhtlinna an chan theih nante, khua leh tui tha leh angaihna hria hruaitu, kan ram hmabak hriltu pawimawh tak an nih theih nante tan la zel ang u.
Indian Information Service (IIS) Officer tling thar Tv Andrew Lalchhandama thinlung takin ka lawmpui a. A hlawhtlinna chan hi midangte fuih phurtu a ni a. Mizoram thalaite CentralService-a inziah tlin tum tur leh India ram inrelbawlnaa fawng pawimawh tak tak chelha, Mizoram tihmingthatu nih tum turin duhthawh takin ka chah che u a ni.
India ramin zalenna a hmuh atanga kum 80 hnaihah Mizoram chu National Rail Network nena thlunzawm a ni ta a. Hei hian thil siam chhuahna, sumdawnna leh thil hralh chhuah tipungin hnam inpumkhatna thar thawh kawngah hmasawnna chak zawk a siam dawn a. Thalaite tan zirna leh eizawnna dap kawngah India ram hmun dang pan zung zung a tih awlsam dawn mai bakah, Mizo hnam ziarang leh thil thar chhuahte India ram pumin an lo hriat chian lehzuala a lo than len deuh deuh theih nana pho chhuah kawngah a pui dawn bawk a ni.
Thalaite India ram huapa kalpui 'Vikshit Bharat Yuva Connect' zawm theuh turin ka chah a. He hmalakna hi Prime Minister chuan August thla hian a tlangzarh dawn a, a hawnna hun hi India ram pumah Live-in a thlir theih dawn a ni. Phase-I hi ni 90 chhung kalpui tur a ni a, August atanga November, 2025 thleng awhin District Headquarters zawng zawngte a tuam chhuak vek dawn a. Phase-II hmangin block leh khaw hrang hranga zirna inte tuam chhuah vek tur niin, kum tluana kalpui tur a ni ang.
Yuva Connect kaltlang hian thalaite'n India ram intodelh Vikshit Bharat siam tura an ngaihdante hmaichhan emaw, digital hmangin an thawh thei dawn a. Sawrkar laipui leh State Sawrkara Senior Political Executive te'n seminar-te telpuiin thalaite hmathlirte an ngaihthlak sak ang a. Hengte hi sawi ho a nih hnuah Sawrkar laipui leh State Sawrkar policy leh programme atan hlawmkhawm niin, thalaite hmathlir Vikshit Bharat siam nana hman tangkai a ni dawn a ni.
Sawrkar laipui ruahman zirna in tha tak tak - Eklavya Model Residencial School, Sainik School, Kendriya Vidyalaya leh Jawahar Navodaya Vidyalaya-te Mizoramin kan nei hi a vanneihthlak hle mai. Thangtharte he hun remchang hi chhawr tangkai thiam turin ka chah a. Mahni in luma awm mai lova, State pawna eizawnna kawng hrang hrangte dap tur leh intuaihriama ram leh hnam tana tha thawhtu nih tum turin ka chah a ni. In thawhrimna leh hlawhtlin duhnaah hian rinna ka nghat tlat a ni.
Mizoram hi India ram hmun pawimawh taka awm a nih avangin khua leh tui zawng zawngte Tuberculosis um bo hmalakna, ruihhlo ngawlveina leh damdawi tawlh do hmalaknaahte tun aia ngawrh lehzuala tha thawh turin ka chah a. Tangruala tha thlah lova kan beih phawt chuan kan zavai tana chenna tlak Mizoram hrisel, him leh hmasawn zawk kan siam thei a. Damdawi hman sual awm lohna, hrisel, viak tha leh chak Mizoram siam tura hmalakna hi kan thupui leh vantlang tana kan rawngbawlna tur a ni.
Kan State hi organic thlai thar chhuah kawnga hmahruaitu ni thei tura thuam leh theihna danglam bik nei a ni a. Loneitu, kutthemthiam leh enterpreneur-te organic farming chawilar tur leh Mizoram chu ram pum mai bakah khawvel huapa organic thil siam chhuah kawnga hmahruaitu leh hmingchher ni tura tan la turin ka chah a. Hmahruaitu ni tur hian kan thar chhuah tawh dante leh hralh chhuah dante kan enlet a ngai a ni.
India ramin zalenna a hmuh ni hian zalenna sualtute tawrhna leh an duhthusam India ram siam turin, ram intodelh leh mahni kut kea ding thei ni tura hmalakna, Vikshit Bharat 2047 puitlin thei turin theihtawp chhuah tlang zel ang u.
In zavaiin India ram zalenna ni chibai ka buk nawn leh vek a che u.
KA LAWM E. JAI HIND.
Tags
News