Hnahthial Post | August 14, 2025, Aizawl: Vawiin khan Mizoram Larsap, General (Dr) Vijay Kumar Singh, PVSM, AVSM, YSM (Retd) chuan School Education Department Secretary Pu David Lalthantluanga leh hotu dangte chu Raj Bhavan-ah kawmin, Sawrkar laipui scheme hrang hrang kalpui dan, State education dinhmun, department hmalakna leh hmachhawp tlangpuite a sawipui.
Larsap General (Dr) Vijay Kumar Singh chuan nakin lawka kan ram inghahna ni mai tur zirlaite enkawl leh zirna tha pek kawngah theihtawp chhuah tlan a tul thu sawiin, hemi tur hian Sawrkar scheme pawimawh tak takte leh National Education Policy 2020 te tha taka kalpui a tul tih a sawi a. Sawrkar laipuiin zirna tihhmasawn nan sum leh pai tam tak a sen thu leh Mizoramah school tha tak tak a din thu sawiin, Mizo mipuite chu Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya-te chhawr tangkai tum turin a chah a. An kalzelna tura puitu turin zirlaite thinlungah thiamna tak tak tuh a tul thu leh school tha leh pan awlsam chhawp chhuah sak a tul thu a sawi bawk.
He hunah hian School Education Secretary Pu David Lalthantluanga chuan Department chanchin, dinhmun tlangpui leh hmalaknate a sawifiah a. Zirlaibu chhung lesson tinte hmaih bik awm lova zir kim vek a nih theih nan Lesson Plan siam a nih thute, School thlan chhuah bik class 3, 6 leh 9 ahte Common Question ruahman a nih thute, zirlaite'n chiang zawka an zirlai an thiam bel theih nan contextualization of textbook kalpui a nih thu leh bilingual textbook siam a nih thute a tarlang a. Zirna tihhmasawn leh zirtirtu indaihlohna phuhruk kawngah Sawrkarin theihtawp chhuaha hma a lak chhoh mek zel thu a sawi bawk.
School Education Director Pi Angela Zothanpuii'n PM Poshan-Mid Day Meal kalpui dan a sawifiah a. State Project Director Pu C. Lalthanzira'n Samagra Shiksha chungchanga pawimawhte a sawifiah bawk.
Heng bakah hian zirna tihhmasawn nana central scheme hrang hrang kalpui dante, Education curriculum duan leh bawhzui a nih dante, National Education Policy 2020 kalpui dante, Sawrkar laipui school tha tak tak Mizorama awmte Mizote'n kan hmelhriat chian lehzuala, tangkai zawka kan chhawr theih dan turte bakah zirna tihhmasawn nana pawimawh dangte chipchiar taka sawi ho a ni.
Tarlan a nih danin tun dinhmunah Mizoramah School 4,418 awm mekin heng zingah hian State Govt. School 2573, Deficit School 26, Govt. Aided School 340 leh Private School 1479 te a awm a. PM SHRI School 35 awm mek bawkin, zirlai nuai 3 dawn vel an awm a ni.
He hunah hian Pu Ajit Roy, Secretary to Governor, Pu Joseph Lalrinawma, Addl. Secretary to Governor leh official dangte an tel a ni.
Tags
News