Hnahthial Post | August 14, 2025, Aizawl: Nimin (13, August, 2025) chawhnu dar 4:00 khan Pu Lalnghinglova Hmar, Minister of State, Sports & Youth Services Department hovin a office chamber-ah August ni 29 a ‘National Sports Day, 2025’ hman dan tur rel a ni. He hunah hian Sports & Youth Services Department, Mizoram State Sports Council, Higher & Technical Department leh School Education Department hotute bakah NSS, NYK Aizawl hotute leh SAI Regional Director te an tel a ni.
Sports Minister Pu Lalnghinglova Hmar chuan National Sports Day chu Indian hockey player hmingthang Major Dhyan Chand piancham-a hman thin a ni tih a tarlang a. “Sawrkar laipuiin rampumah uar taka National Sports Day hman a duh a. Infiamna, hriselna leh ‘fitness’ chawisan nan Mizoramah pawh uar tak leh phur taka hman a tha a, a bikin zirna inah te taksa leh rilru hrisel pawimawhzia inzirtirna remchang tak a ni” a ti.
Mizorama ‘National Sports Day 2025’ lawmna pui ber chu August ni 29 ah SAI Training Centre, Mission Vengthlangah hman nise tiin meeting chuan a rel a. S&YS, MSSC, SAI officer leh staff te bakah Aizawl-a NCC leh NSS te, SAI leh KISCE trainee te chu group pali ah inthen in futsal (mipa), in arpa sual (mipa), volleyball (hmeichhia) leh inkawibah (hmeichhia) ah te an inel dawn a ni. Zirna in hrang hrangah ‘Fit India’ thutiam lâk leh infiamna neih te, National Sports Day chungchang inzirtirna te State NSS Cell bultumin kalpui nise ti a rel a ni bawk.
Kumin National Sports Day hi ni hnih chhung hman a ni dawn a. August ni 30 ah S&YS Department hnuaia academy hrang hrang te, KISCE leh district hrang hranga Khelo India Centre te, MSSC leh SAI (Aizawl) te’n anmahni hmun theuhah inelna (competitive games) buatsaih nise tiin meeting chuan a rel a ni.
Tags
News