Minister Dr Vanlalthlana’n nurse-te tana buatsaih State Level Workshop a hawng

Hnahthial Post | Aug 17, 2026, Aizawl: Minister Dr Vanlalthlana chuan vawiin khan Mizoram College of Nursing (MCON) Hall, Falkawnah nurse-te tana buatsaih “Clinical Skills and Competency for Nursing Managers” workshop a hawng.

He State level Workshop hi Multi-Modal Training and Teaching Centre (MMTTC), Mizoram University, leh Continuing Nursing Education, ZMC&H te tangkawp buatsaih a ni a. Nursing Manager te thiamna tipung tur leh hruaitu (leader) tha an nih theihna tura inzirtirna atan he workshop hi August ni 22 thleng neih a ni ang.

Minister chuan damlote enkawlna kawngah nurse- te pawimawhzia sawiin, clinic leh ward-a an mawhphurhna bakah an hnuaia thawktuten ngilneihna nen damlote an enkawl theih nana zirtirtu leh hmahruaitu an ni, a ti a. An hna chu mi dangte tana inpekna a nih avangin Mizo nun ze mawi “tlawmngaihna” nen pawh a inhmeh hle a ni, a ti. Tunlai thiamna thang zelah damlo te enkawlna kawngah pawh intuaithar zel a tul thu te, hmanraw chhuak thar apiang hmang thiam tura inzir zel te leh taimak a tul thu Dr Vanlalthlana chuan a sawi a. Anmahni chauh ni lo, an thawhpuite leh an hnuaia thawktute pawhin hma an sawn theihna turin Workshop an neih mek chu hmang tangkai turin a chah a ni.

Khualzahawm Prof. K. Robin, Director, Malaviya Mission Teacher Training Centre (MMTTC), Mizoram University pawhin damlo te tana nurse te hlutzia te, indaihlohna karah pawh zan tam tlaivara damlo te tana an inpek thin thu te, Mizoram mipuite hrisel kawngah an mawhphurhna sanzia a sawi a. Intuaitharna tur hun tha an neih chu hlawk taka hmang turin a sawm a ni.

Continuing Nursing Education (CNE) Chairman Pi Esther Lalruatmawii kaihhruai he programme ah hian ZMC&H Nursing Superintendent Pi Laltlanpuii’n kalkhawmte lawmna thu a sawi a. Mizoram chhung hmun hrang hrang atangin sawrkar leh private damdawi ina thawk nurse engemawzat he workshop-ah hian an tel a ni..