Hnahthial Post | August 9, 2025, Hnahthial: Sawrkar laipui Department of Science and Technology bultuma kum 1993 atanga neih thin, zirlai kum 10 atanga kum 17 inkar tana buatsaih, Children's Science Congress (CSC) chu kuminah pawh "Science for Sustainable Development and Community Well Being" tih thupui hmangin buatsaih a ni leh dawn a. Hemi denchhhen hian Samagra Shiksha chuan District chhung school hrang hranga zirtirtute tan BDO Conference Hall-ah Sensitisation Programme buatsaihin, Resource Person, Pu Joel Lalbiakkima, Scientific Officer, MISTIC chuan zirtirtute hnenah Science Congress chungchanga an hriattur tulte a hrilh a ni. District Education Officer, Pu H.Sangthanga chuan he hunah hian zirtirtute hnenah fuihna thuchah a sawi bawk.
Pu H.Sangthanga chuan science chu kan chhehvel leh kan nitin nuna kan hman thin, kan nuna bet tlat a nih avanga science lamah tan kan lak a tul hle a ni a ti a. Tunlai khawvelah phei chuan a pawimawh lehzual thu sawiin zirtirtute chu scientific attitude, zirlaite rilruah tuh theuh tura chahin chumi tur chuan zirtirtu ngei pawhin chu rilru chu an put a tul thu a sawi a. Tuna Children's Science Congress pawh hi zirlaite rilruah science lama tuina leh phurna tuh theihna tur pawimawh tak a nih thu a sawi bawk. Hnahthial-ah Science zirna, Higher Secondary School pahnih chauh a awm thu tarlangin heng pahnihah te pawh hian zirlai an tlem thu a tarlang a. Naupangte rilru ti danglam tur chuan zirtirtute kan danglam phawt a tul thu sawiin science lama tuina tuh tur chuan a hmasa berah zirtirtute chu tui tur khawpa kan inzir a kan inchhiar peih ve a tul thu a sawi a ni.
Hnahthiala District Education Office din a nih hnu hian State aiawihin Children's Science Congress-ah National Level thum lai mai Hnahthial atanga chhuak an awm tawh thu a tarlang a. National Level-a chhuak pha nei leh tura tan lak a tul thu sawiin chumi tur chuan zirtirtute chuan he Science Congress hi hna chuangliam anga ngai lo tur leh hmabak tlak tur anga leka ngai lo turin a chah a ni.
Resource Person, Pu Joel Lalbiakkima chuan Children's Science Congress buatsaih a nih chhan te sawifiahin zirlaite tan research tha tak tak, khawtlang tana tangkai si neihna remchang a nih thu a sawi a. Zirlaite rilru puthmang leh zirlaite khawhawi tih zau nana tangkai tak a nih thu a sawi bawk. Zirtirtu kalkhawmte tan research leh presentation neih dan tur sawi ho niin tih chhinna neih nghal a ni.
He hun hi Pu FP Laltlankima, District Coordinator, Children's Science Congress chuan kaihruaiin Pi Lalbiakzuali Pachuau, Academic Coordinator, Children's Science Congress, Hnahthial District chuan lawmthu sawiin hun a khar a ni.
Tags
News