Hnahthial Post | August 9, 2025, Aizawl: Tourism Department bultuma Mizoram district hrang hranga June atanga lo kalpui tawh, thawnthu sawi hmanga inelna ‘Narrating Mizoram: A Tales of Our Land – Storytelling Competition’ hmawrbawkna chu zanin khan Tourism Department Minister Pu Lalnghinglova Hmar chuan Ignite Studio, Khatlaah a hmanpui a. District tina District Level Storytelling Competition buatsaih atanga thlan chhuah mi 15 an tel a ni.
Khuallian Pu Lalnghinglova Hmar, Minister, Tourism Department chuan zin mite hip nan leh kan ram hmun pawimawh leh nuam tak takte chanchin vawn nun nana Mizoram district hrang hranga hmun pawimawh behchhana thawnthu sawi hmanga inelna buatsaih a ni chu lawmawm a tih thu a sawi a. Kan ram, kan hnam leh kan hmunhma chanchinte ngaihnawn taka midang hnen a kan sawi thiam chuan a ngaithlatute thinlungah a taka hmuh ve chakna a tuh a, chu chu kan rama Tourism tih hmasawnna kawngah thil pawimawh tak a nih thu Minister chuan a sawi a. Mizoram hmun hrang hrang thawnthu sawia inelna buatsaihna hian zin mite hipna kawng ah hmasawnna a thlen ngei a beisei thu a sawi bawk a ni.
Pi R.Lalrodingi, Director, Tourism Department chuan kalkhawmte lawmna thu sawiin zin mite leh a chhunga chengte vekin kan State chhunga hmun nuam tak tak an hmelhriat nan leh tlawhchhuah a nih theih nana, phochhuah tlakte phhochhuak tura District level atanga inelna hi buatsaih a nih thu a sawi a. He hmalakna hlawhtlin nachhan pawimawh ber chu he inelna a tel te vang a nih thu sawiin Participants chungah leh Deputy Commissioner zawng zawng chungah lawmthu a sawi a. Tourism tihmasawn tur chuan kan ram leilung hausakna, a hmelhmang danglam bikte leh zimmite tana service kan pek theih hrang hrangte phochhuah tam hi a pawimawh thu a sawi.
‘Narrating Mizoram: A Tales of Our Land – Storytelling Competition’ hmawrbawknaa tel te chu; Aizawl District atangin Grace Lalrinpari leh PC Lalruatdika; Lunglei District atangin Zorinmawii Ralte; Siaha District atangin Zine P fachhai; Champhai District atangin K.Lalvenpuii leh Vanlallawmkima Gangte; Kolasib District atangin Josia Lalruatfela; Serchhip District atangin Lalruattluanga leh Lalthanzami Chhangte; Mamit District atangin Rodinsanga; Hnahthial District atangin Dr. K.Lalzuimawia; Saitual District atangin Deborah Lalnghakmawii leh Esther Lalmalsawmi; Khawzawl District atangin Pu H.Lalngurliana leh R.Lalhlimmawii-te an tel a ni.
‘Narrating Mizoram: A Tales of Our Land – Storytelling Competition’ hmawrbawkna ah hian lawmman 1-na chu Serchhip District-in lain lawmpuina thuziak leh pawisa fai Rs.50 000/- an dawng a, 2-na chu Saitual District niin Rs. 30,000/- an dawng a, 3-na lawmman chu Khawzawl District-in lain Cheng Rs. 20,000/- an dawng a ni.
Tags
News