Hnahthial Post | August 28, 2025, Hnahthial: Vawiin khan Venglai YMA Hall, Hnahthialah District Fisheries Development Office bultumin Tribal Sub Plan & Schedule Caste Sub Plan 2025-2026 hnuaiah 'One Day Awareness Training Programme for ST/SC Beneficiaries' buatsaih a ni a. Disease & Health Management in Carp Culture chungchang te, Water Quality Management in Aquaculture chungchang leh Culture of India Major Carp & Pond Management chungchang te zir a ni.
DFDO, Pu George Lalnuntluanga chuan sangha dil siam chungchang, Sangha dil enkawl dan leh Sangha a natna awm thei ang chi leh enkawl dan an zir tur thute sawiin training lo chhim tute chu ngun tak leh uluk taka zirtirna dawngsawnga zawm theuh turin a sawm a. PMMSY Scheme hnuaia tanpuina dawngtu mi engemaw zat koh tel an nih thu sawiin tanpuina dawngtute'n tanpuina pek chhan an nih ang ngei in, dik tak leh rinawm taka hna kan thawk turin a sawm a. Officials lam pawhin a endikna lamah theih tawp an chhuah tur thu te a sawiin, harsatna leh buaina an nei a nih chuan an hnenah thlen thin turin a chahin a sawm nghal a ni.
He hunah hian District Programme Manager (DPM), Pi F. Lalhmangaihzuali leh Fisheries Demonstrator, Pu C. Lalhlenzova Sailo ten sangha khawi tute hi zirtirna pein zawhna leh chhanna hun hman nghal a ni.
Training neih zawh hnu hian Pradhan Mantri Matsya Sampada Yojana 2024-2025 (PMMSY) hnuaia sangha dil, Rearing pond siamna dawng tur mi sawm hnih panga (25) hnenah cheng 84,000 theuh pek niin PMMSY 2023-2024 leh 2024-2025 hnuaia input support (Sangha chaw leh thil dang leina tur dawng) dawng tur mi sawm hnih pahnih (22) hnenah cheng 30,000 theuh tanpuina pek chhuah nghal a ni a. Vawiina tanpuina pek chhuah hi a vaiin cheng nuai sawm hnih pasarih leh sing ruk (Rs. 27,60,000) a ni.
Tags
News