Hnahthial Post | August 26, 2025, Hnahthial: MSACS leh DAPCC tangkawp chuan District Level Red Ribbon Quiz Competition chu vawiin khan Hnahthial DC Conference Hall-ah buatsaihin Bawrhsap, Pi K.Vanlalruati chuan khuallian niin a hmanpui a. Govt Pangzawl High school chuan lawmman pakhatna lain State level-ah District aiawhin an chhuak ang.
Bawrhsap chuan Red Ribbon din chhan, an hmalakna te leh quiz buatsaih a nih chhan te sawifiahin zirlai naupang tel zawng zawngte chuan an thil zirte chu AIDS dona kawnga hmawsawn nan leh midang zirtir nan hmang tangkai se a duh thu a sawi a. MSACS chu NGO leh kohhran hrang hrangte nen an tankawp thin thu te sawiin HIV hrik pai test dan kawng hrang hrang a awm tawh thu te a tarlang a. HIV paite tan enkawlna leh chhawmdawlna hrang hrang a awm thu sawiin HIV hrik paite endawng leh thinhrik lovin, hriatthiamna zau zawk nena en theuh turin zirlaite chu a chah nghal a ni.
Chief Medical Officer, Dr. R.Lalsanglura chuan National level thleng ngei thei tura tang turin zirlaite chu chahin Quiz buatsaih a nih chhan chu HIV/AIDS dona kawnga tun aia hma kan sawn theih nan a nih thu a sawi a. Inelnaa tihthat ai mahin HIV chungchang kan hriatchian a, kai lo tura kan invawn that chu an ngaih pawimawh ber a nih thu sawiin quiz atana inbuatsaih zirlai zawng zawngte chu an thil zirte vawng renga, a taka hmang tangkai theuh turin a chah a ni.
Quiz Competition neih zawh taka lawmman dawn dan chu:-
1st Position :- Govt Pangzawl High school
2nd Position:- St Stephen's school
3rd Position:- FD Higher Secondary school
District Quiz Competition-ah hian School pariat an tel a. Pakhatna hi State level-ah District aiawhin thlalehah an chhuak ang a, State level -a pakhatna hi Sikkim-ah Regional level a inel tura chhuakin an paltlang chuan National level inelnaah an chhuak leh ang.
Tags
News