Hnahthial Post | August 28, 2025, Thingsai: Tarpho khawtlangin an khawchhunga Airtel tower an shutdown avangin a chhehvel khua Thingsai leh New Ngharchhip khua ten internet signal an nei lo.
Tarpho a Airtel tower awmna hi High school ram a ni a. A ram hawh man ( Land rent) erawh mimal account ah a lut reng a. Amaherawhchu, High School ram chhunga awm a nih angin High School managing Board kuta land rent hi lut tura hma lak a ni a, hei hi a thu chuan an in be rem tawh a. High School Managing Board hian land rent pawh hi sân ve an phut a,hemi chungchang leh Managing Board kuta Land rent lut tur hian Tarpho khawtlang te hian airtel lam nen agreement siam tur hian an nawr a.Vawi tam tak an nawr a, an hun ruat an tawlh zel avang leh agreement hi an ziahpui theih loh avangin 21st August 2025 aṭang khan Tower hi an shutdown a, 31st August 2025 thleng hun an pe a.Ni 25th August 2025 khan Lunglei lam aṭangin airtel lam hotu pa C.I. Lav hi Tarpho ah chho in agreement siam pui tura an ngaih laiin, land owner thlak ringawt tum in, land rent sàn chungchangah engmah a sawi duh loh avangin an in rem thei ta lo a ni.Tarpho khawtlâng hian kar 1 chhung hun pe in, an demand hi an tihhlawhtlin theih loh chuan Tarpho aṭanga in la chhuak turin Airtel lam hi an hriat tir a ni.
Thingsai leh New Ngharchhip khua te hi Tarpho tower aṭanga Air Fibre line a kah a nih avangin internet signal an neihloh avang hian Thingsai, Tarpho leh New Ngharchhip mipuite an buaiin harsatna lian tak an tawk mek a ni.An harsatna sutkian a nih theih nan thuneitute an ngen nghal a ni.
Tags
News