Hnahthial Post | September 8, 2025, Aizawl: Vawiin khan DC office, Aizawl buatsaihin, Vanapa Hall-ah AH&Vety Department hnuaia Progress Partner te tan Orientation Training leh CM Special Package semchhuahna hun hman a ni a. Pu Lalmalsawma Pachuau, IRS,Secretary, Planning &Programme Implementation Department chuan khuallian niin he hun hi hmanpui a, Training Certificate a semchhuak bawk.
Training hawnna inkhawm tawiah thu sawiin, Khuallian Pu Lalmalsawma chuan Bana kaih( Hand Holding) Scheme hnuaia CM Special Package dawngtute hi ‘Beneficiaries’ ti lova, ‘Progress Partners’ ka han tina chhan che u chu; Mizoram hmasawnna tura Sawrkarin thawhpuia tana a thlanchhuah te innih vang a ni. Chuvangin sum harsatna karah pawh installment-a in pe lovin,a hlawmin vawikhatah kan pe vek che u a ni. Sawrkarin thawhpui atana a rin ngam ang che u in, nangni pawhin rinawm takin in pawisa dawn te hi ahmanna tur dik takah hmang turin sawrkarin a beisei tlat che u a. Monitoring team ten inhmalakna an vil reng dawn a, an ham strict hle dawn a ni tih pawh in hriat reng a tha ang, a ti. Pu Lalmalsawm chuan UD&PA Minister K.Sapdanga'n ‘Self Help Group’ te fuih nana a sawifo thin "Hausak aiin ngialnghet hi tum hmasak tur" a tih chu sawi chhuakin, Progress partner te chu an CM Special package dawn hmanga Ngialnghehna Rahbi rinawm tak leh taima taka tuk theuh tura ngenin, duhsakna a hlan bawk.
Vawiin hun hman hi session 2-ah thenin, Session khatna hi Inaugural function a ni a, session khatna hi Pu Zoramsiama Hmar, Addl.DC, Aizawl chuan kaihruaiin, Aizawl DC Er.Lalhriatpuia’n Key Note address sawina hun a hmang bawk. P&PI department atangin “Overview of CM Special Package” tih thupuia hmangin CM Special package hnuaia progress partners thlanchhuah dan te, Monitoring kalpui dan tur te leh a kaihhnuai thil hriattur pawimawh sawina hun an hmang bawk. Vawiinah hian AH& Vety Department hnuaia Progress partners mi 203 te hnenah Orientation Traiing hi pek a ni a. An sum dawn tur hi DBT in an account-ah vawiinah thunluh hman vek tum a ni a, vawiin thunluh hman loh chu naktukah thunluh vek a ni ang. July ni 24 khan Department 11 hnuaia Progress partners 467 te hnenah CM Package leh hetiang Orientation Training hi pek an lo ni tawh a ni.
2nd Session hi Progress partner te tan Training pek nan hun hman a ni a. “Introduction to Entrepreneurship & Business Management” tih thupuia hmangin Mizoram Start-Up Mission (MSUM) ten training an pe a. “Basic Bookkeeping” tih thupuia hmangin Lead District office atangin zirtirna hun a hmang bawk.
Dr. T.C Lalthanzauva, District Animal Husbandry & Veterinary Officer,Aizawl District chuan “Vote of Thanks” hmangin vawiin training hun hi a khar ta a ni.
Tags
News