Hnahthial Post | September 8, 2025, Aizawl: Vawiin khan Conference Hall, Directorate of School Education, Aizawlah Adult Education Wing, School Education Department buatsaih, ziak leh chhiar thiam hlutzia leh a pawimawhna inzirtirna “International Literacy Day 2025” lawmna hun hman a ni. He hunah hian Pu K. Sapdanga, Hon'ble Minister, Home Department chu khuallian niin hun a hmanpui a, ULLAS booklet, Meichher Digitization leh Meichher Golden Jubilee 2025 Special Edition & Souvenir te a tlangzarh nghal a ni.
Vawiin inkhawmah hian khuallian Pu K. Sapdanga chuan thu a sawi a, ziak leh chhiar pawimawhna inzirtirna “International Literacy Day 2025” leh Meichher Golden Jubilee lawmna hun hmang tura sawm a ni chu lawmawm a tih thu sawiin, ziak leh chhiar huanga thahnem ngai taka thawktute pui thintu a nih thu a sawi bawk.
Minister chuan Meichher buatsaihtute chuan ziak mite cho chhuahna rilru pua, thu tha hmanga hmasawnna kawng a tam thei ang berin an chhiar theih nana an thahnem ngaihna te chu an hlawhtlinna chhan nia a ngaih thu a sawi a, rual u zawk ten thangtharte chu hmasawnna nghet nei tura kai hruai turin a fuih nghal bawk a ni.
Khuallian chuan hlawhtlinna chang tawhte chanchin chuan rilru a khawih hle tih a sawi a, hlep zat tur chhut ai chuan miin zar an zo theih dan tur chhut chuan hlawhtlinna dik tak a thlen tih chu hlawhtlingte chanchin “Success story” leh chanchinbu buatsawih kawnga a hna lo thawh tawh chanchin atanga zir chhuah tur pawimawh tak a nih thu a sawi.
Pu K. Sapdanga chuan tunlai khawvel chu Digital Era-ah kan cheng tawh tih a sawi a, kumin thupui “Promoting literacy in the digital area” a nih angin vawiina digital publication tlangzarh a ni chu a inrem hle tih a sawi a. Internet khawvelah kan chen hnuin digital media atang kan duh zawng koh chhuah mai a awlsam tawh tih sawiin, literacy digital publication chu khawvela literacy-in a thlen san theih ber nia a hriat thu Minister chuan a sawi bawk a ni.
Vawiin hun hmanna hi hma lam hun atana rahbi pawimawh tak ni turin Minister Pu K. Sapdanga chuan a duhsakna a hlan a, hemi kawnga thawktute pawh theih tawp chhuah a, tangkai taka ram leh mipuite tana thawk chhunzawm zel turin a sawm a ni.
Vawiin inkhawmah hian Pi Angela Zothanpuii, Director, School Education Department chuan inlawmna thu sawiin, School Education Minister Dr. Vanlalthlana “International Literacy Day 2025” thuchah chhiar chhuahna hun a hmang nghal a. Khuallian Minister Pu K. Sapdanga bakah hian Pu T.C. Lalremsiama, Asst. Director, Adult Education leh Pu R. Lalrawna, Meichher sulsutu leh Padma Shree Awardee ni bawk ten thu an sawi.
Pu R. Lallianzuala, Chairman, Meichher Golden Jubilee Special Edition Sub-Committee chuan Meichher Golden Jubilee 2025 Special Edition & Souvenir chungchang sawi hawnna a nei a. Adult Education bul tumin Model Central for Critical Life Skill and Occupational Skill Development Programme hnuaia beauty culture trainee, Pi Helen Lalfakawmi leh ULLAS hnuaia zirlai hlawhtling, Pi VL. Awmpuii ten an hlawhtlinna chanchin an sawi bawk a ni. Vawiin inkhawm hi Pi R. Lalnunthari, Joint Director of School Education (E) chuan lawmthu sawiin a khar a ni.
Tags
News