Hnahthial Post | September 8, 2025, Aizawl: Mizoram State Healthcare Society (MSHCS) official Website - mshcs.mizoram.gov.in chu Health & Family Welfare Minister, Pi Lalrinpuii chuan SAD Conference Hall - II, MINECO -ah mipuite hman theih turin a tlangzarh a. Dr. Lalhriatzuali Ralte, CEO, MSHCS chuan Mizoram Universal HealthCare Scheme (MUHCS) hman tan a nih atanga tun thlenga an dinhmun pawimawh zual tarlangin tun dinhmunah Mizoram chhungah empanelled private hospital sawm leh pakhat (11) an awm tawh thu a tarlang.
Pi Lalrinpuii chuan MUHCS chu hlawhtling taka kalpui a nih zel thu leh chhawr tangkai tam tak an awm tawh thu a sawi a, a hlawhtlin theih nana theihtawp chhuahtute hnenah lawmthu a sawi bawk. Cashless system hman a nih avangin chhungkaw tam tak phurrit a chhawk thu leh he scheme zawmtu, empanelled hospital pawh an awm ve nual tawh thu a sawi a. Chumi a nih avang chuan mipuite leh sawrkar hnathawkte pawh empanelled hospital-ah zel in admit turin a chah a ni.
MUHCS hnuaiah hian State pawna inenkawl turte tan Medical Board paltlang tul tawh mah se refer kawngah harsatna a awm dawn loh thu leh thil mumal taka kalpui duhna vang zawk a nih thu a sawi a. Emergency Case-ah phei chuan awlsam taka kalpui a nih theih dan tur ngaihtuah zel a nih tur thu a sawi bawk. Website tlangzarh tak chu mipuite harsatna tam tak chingfeltu a nih ngei a beisei thu a sawi a ni.
Dr Lalhriatzuali Ralte chuan April ni 1, 2025 atanga tun thlenga MUHCS dinhmun tarlangin Mizoram chhungah Empanelled Private Hospital sawm leh pakhat (11) leh Private Day Care Centres pathum (3) an awm thu a tarlang a. Mizoram pawnah Empanelled Hospital sawmhnih leh panga (25) awmin, Deemed Empanelled Hospital sawm leh pathum (13) an awm bawk.
MUHCS hnuaiah hian Mizoram chhung hospital-ah mi 30,565 te inentirna man tumsak tawh niin Mizoram pawnah mi 698 te inentirna man tumsak tawh a ni a. Heng mi 31,263 te inentirna man atana MUHCS in a tumsak tawh zat hi a vai belhkhawmin Rs. 42,06,73,812 a ni.
MSHCS Website chungchang technical report chu Pu Lalzirtira, Informatics Officer, chuan a pe a. He website kaltlang hian MUHCS chungchanga zawhna tam tak awm thin, empanelled hospital awm zat te, MUHCS kalphung leh MUHCS chungchanga thuthar apiangte chu rang takin a hriat nghal zel theih tawh dawn a ni.
He website tlangzarhna programme-ah hian Finance Secretary, Pu Ramchuana leh officials pawimawh tak tak te telin Pu Lalchhuanawma, Deputy CEO, MSHCS chuan kalkhawmte hnenah lawmthu sawiin hun a khar a ni.
Tags
News