YMA No-a Zu in
- H Laldanmawia
Thlan laihnaa kal, thlan lai tawiawmtu, thlan lai ve tura phut chi ni chiah lo, thlan laihna piah deuha lo ti tite chuan 'in' tur an nei a. Inna tur no an nei lo thung a. No awm chhun chu YMA no chiah a ni. YMA no hman leh hman lohah an rilru a inkhap mek laiin an zinga pakhat chuan 'YMA No-a zu in chu ka thei ngang lo' a rawn tih takah chuan ro dang an nei ta a. YMA No chu lo hmang ta pawh ni se tu-khaw-kha mahin an hre lo mai thei a, an sawi zui teh vak lo mai thei bawk. No chu a chhiat phah hek lovang. Mahse, No chu YMA No a ni tlat. YMA chet velnaa ruih theih an rawn paipawn hi a fuh viau lo naa fakawmna riau an nei a.
YMA chu pawl thianghlim leh zahawm tak a ni tih an hria a. An pawi sa a ni. He mite hi chu an nihna angin an lang ngam a, YMA chu inphen nan hmang lovin an zah a. YMA bungraw hmanga tih loh tur tih chu thiang lovah an ngai a ni. YMA hi eng angin nge kan hmuh a, eng atan nge hman kan tum a, engtiangin nge kan lo hman tawh thin? tih hi suangtuahnaah an piantir a ni.
YMA phenah hian enge kan tih a, YMA hi bikruk nan kan hmang em? YMA zu man sa lo paipawn tawh thin kan awm em? YMA-a nihna chelh chapopui te, hamthat nana hmang te, intih-vei nana hmang te, hruaitu ni chunga ruih ruk hmangte kan lo ni em ?
YMA hi thil pek hmanga tih lawm te, rual pawl nan leh khawtlanga tlak tlum tum nante kan lo hmang em?
YMA hi politics khelh tumte intihlar tumna angah te, politician-te leh a remchanna apianga thil dil thin pawl angah te, donation leh sponsorship hmanga intung nung ve mai angah te, thliar bik neia rorel thin pawl anga ngaih theih turtein a nihphung hi a hloh em ? Tuai thar nawn sek ngai member nei teuh angah te, zu tel lova intuaitharna hun hmang thei lo Association anga hmuh theih tur tein kumtawp kan khar fo em?
YMA-a kan tel dan rilru, kan tel chhan leh YMA member kan nihna leh kan chanvo chelh dan rilru azirin he pawl ropui leh hlu tak hi mi ngaihin a danglam thei. Sakhuana meuh pawh tunlai miltir kan tum tâkna thalaite khawvel kan tihah hian, YMA member-te hian YMA rilru dik tak kan nei tak meuh em tih hi ngaihtuah a ngai hle. YMA member chuan kristian nun dan tha a ngaisang ringawt tur a ni lova, a nunpui tur a ni.
Zu ruih vanga buaina siam, YMA hminga zu nam ve tho chunga zilhtu ka hre tawh a. Kohhran thalaia tel chunga zu in thiang lova ngai a, YMA huang chhunga zu in pawisa lo ka hre bawk a. YMA-in kan tanpui chal delh taka tawng khumtu ka hmu tawh bawk.
Hetianga YMA hmang dik lotute vang hian YMA chu a tha ta lo tihna a ni lo. YMA chu YMA a la ni reng a. A thil tum leh duh dan pawh a la pangngai reng. Mahse, YMA hmang sualtute vangin mi thenkhat hian YMA-a tel chu sakhaw mi lo riaua hriatna an nei a. Kristian thinlungah YMA chu a khawvel deuh roh ta tlat a. YMA leh KOHHRAN inkar hi a zau hret hret niin a lang.
YMA chuan thil tha tiin tlawmngaihna lantir thin mah ila, ruihhlo doin a zuartu chu ensan hial pawh ni ila YMA No-a thingpui leh zu kan in pawlh phawt chuan kan thingpui sem rim hi zu rim zawk hian a luahlan zel tho ang. Chuvangin YMA-a kan in-baptis dan rilru hi bihchian a ngai e.
Tags
Article