Hnahthial Post | September 17, 2025, Aizawl: Vawiin khan Chief Minister Pu Lalduhoma chuan Mizoram Civil Services Combined Competitive Exam-a tling, Administrative Training Institute-a Combined Foundation Course kal mek, MCS, MFAS leh MIS officers te CM Conference Hall-ah a kawm.
Chief Minister chuan officer tharte hi lawmpuina hlanin an kal zelna turah duhsakna a hlan a. In hna hi Pathianin in rawngbawlna tura a pek che u a ni a. Phur tak leh rinawm takin in thawk dawn nia. Service hrang hrangte a huhova training in nei hi lawmawm ka ti khawp mai. Hei hian in zingah innelna leh inhriatthiamna thuk tak a siam dawn a. Ramin a hlawkpui dawn a ni. Reilote chhungin Mizoramah service rivalry a nasa lutuk tih ka hmu a, he inelna tha lo hi tihbo kan duh a, nangni hi chuan rawn chhawmlut ve suh u, a ti. Tin, tunah hian in rilru chak vanglaite a la nih avangin UPSC lam pawh la exam zel thei ula a thain ka hria. Central Service lama kan tling hlei thei lo hi rualawh a nain kan mamawh em em a ni, a ti bawk.
Officer ten an hnuaia thawk, staff hniam zawkte hamthatna ngaihsak se a duh thu pawh a hrilh a. Staff hniam lama indaih lohna nasa lutuk tihziaawm tul an tih thute pawh a lo hrilh. Sorkar hnathawk chuan, mipuiten ram rorelna an pekte apiang hi tha tak leh rinawm takin thlawp ila, hmasawnna hnathawh a chakin a kal tluang thin. Chutihrualin, tuten emaw ruling mi leh sa an nihna changchawia thil dik lo tihtir che u an tum a nih chuan lo hlau suh u. Kan hum ang che u, tiin a chah.
Officer training mekte hi Pu Lalhmansanga Khiangte, MCS, Jt. Director, leh Pi Golda Dell Zohmangaihi ten an rawn ho a ni.
Tags
News