Hnahthial Post | September 17, 2025, Hnahthial: Vawiin khan Hnahthial DC Meeting Hall-ah District Level Committee on District Water & Sanitation Mission member-te chu Chairman leh Bawrhsap ni bawk, Pi K. Vanlalruati kaihruaiin an thukhawm a. Hnahthial District chhunga 'Swachhata Hi Seva' (SHS) kalpui dan tur rel niin thutkhawmna neih zawh hian DC staff te nen DC pisa tualzawlah Faina thutiam chham nghal a ni.
Thutkhawmnaah hian sawrkar laipui, Ministry of Housing and Urban Affairs leh Ministry of Jal Shakti ten SHS -2025 campaign kalpui dan tur atana inkaihhruaina an rawn siam te tihhlawhtlin a nih theih nana Hnahthial District chhunga hmalak theih dan te rel ho a ni a. Uluk zawka tihfai tur - Cleanliness Target Units (CTU) atan Hnahthial khaw chhungah hmun li (4) -Nauhruaikawn, Ropuiliani Square, Bazar leh Electric market te chu thlanchhuah an nih tawh thu tarlan niin faina hnatlangpui hi September ni 25-ah hian neih tura ruahmanna siam a ni.
SHS pual hian Flyer/Poster making competition buatsaih tur niiin school-ah awareness quiz programme buatsaih a ni ang a. Sanitation Workers te tan health check-up neih a ni bawk ang.
SHS-2025 hi September ni 17 atanga October ni 2 thleng neih tura ruahmanna siam niin a kharna hi DC Conference Hall-ah buatsaih a ni ang.
Swachhata Hi Seva, 2025 thupui chu 'Swachhotsav' tih niin nikum lamah 'Swabhav Swachhata - Sanskar Swachhata ' tih thupui hmanga lo kalpui tawh a ni a. SHS hi kum 2017 atang khan India ram pumah kum tin neih thin a ni.
Thutkhawmnaah hian Addl DC, Pu Zothanmawia Khiangte; PHE Sr. EE, Pu K.Lalkima; DRDO Project Director, Pu HD Lalpekmawia; Range Officer, Pu Lalsangzuala; DUDO, Pu Hmingmawizuala; SDEO, Pu S.Lalthanzuala; ADAO, Pi Linda Lalduhzuali; DIPRO, Pu F.Lalrinfela leh PHE SDO, Pu Lalhmangaihzuala te an tel a ni.
Tags
News