Hnahthial Post | September 10, 2025, Aizawl: Vawiin khan Health and Family Welfare Minister Pi Lalrinpuii chuan a office chamber-ah Bal chungchang zirbingna “Research on Phytochemical constituents & galactagogue properties of Colocasia esculenta (taro) and determination of its nutritive value” report bu a tlangzarh.
He hunah hian Health Minister Pi Lalrinpuii chuan thu a sawi a, Mizo chaw lar tak bal zirchianna research a awm thei chu lawmawm a tih thu leh hemi kawnga hma latute chu fakawm a tih thu a sawi. Minister chuan bal chu Mizo culture a bet tlat a nih thu leh a thatna chi hrang hrang tlang hriat mai ni lova, research hmang ngeia hmuh chhuah a ni chu a hlut hle tih a sawi a, packaging leh marketing kawngah pawh a 'nutritional value' nena tarlan thlap a ni thei tur chu lawmawm a tih thu a sawi bawk a ni.
Health & Family Welfare Secretary Pu H. Lalengmawia pawhin thu sawiin, Mizo chaw tha tak bal zirbingna chhawp chhuah a ni ta chu ropui a tih thu a sawi a, research ti thin te pawhin research thupuiah a awlsam ringawt thlang lova Mizo mipui tena an chhawr theih tur leh Mizo culture nena inrem tak research topic thlang thin tura a duh thu a sawi bawk a ni.
Mission Foundation Movement, Executive Director, Pu Lalramchuanzela chuan inkhawm kaihruaiin, project report tawi a pe a, Project Investigator Mercy Lalrempuii chuan technical report a pe bawk a ni. Vawiin hun hmannaah hian Pu H. Lalengmawia, Secretary, Health & Family Welfare, Pi Zoramthangi Chhangte, Director, Women and Child Development, Pi Lalchhuanmawii, Principal, Laithangpuii College of Pharmacy, Mission Foundation Movement hotute leh Research paper buatsaihtu Laithangpuii College of Pharmacy faculty leh research team te an tel a ni.
Mizoten thalai zinga kan ei lar tak Bal hi chaw tha a nih mai bakah nu hnute tui a ti tam thei tih sawi a awm avangin Mission Foundation Movement chuan zirchian tul an ti a. Ministry of Tribal Affair hnuaia Support to Tribal Research Institute scheme hnuaiah kum 2022-23 chhung khan Social Welfare & Tribal Affairs kaltlanga research hna hi thawh a ni.
He zirbingna hi Laithangpuii College of Pharmacy faculty leh research team ten kum khat chhung ngawrh takin an bei a. Mizoram University, Mizoram Food Processing Research and Training Centre, RIPANS te leh NIPER Guwahati ten technical support an pe bawk.
He research hian a tum ber chu Balah hian nu hnute tui ti tam theitu compound-a awm dan zirchian a ni. Compound awm zawn chhuah nan Preliminary Phytochemical screening leh Liquid Chromatography- Mass Spectroscopy hman a ni a. Nutritional Composition hi Association of Official Analytical Chemists in an recommended method hmanga zawn a ni. Compound hmuh chhuah zir chian nan computer-based study ah hian Schrödinger Software hman a ni.
He zirbingna in a hmuhchhuah tlangpui te chu: Balah hian compound thenkhat alkaloids, flavonoids te leh glycosides a awm tih hmuh a ni a. Heng compound te hi mihring tana chakna a thlen theih piah lamah nu hnute tui a ti tam theia ngaih a ni. He compound te hi then darh a, zirchiannaah chuan natural compound Luteolin 6, 8-C-diglucoside a awm tih hriat a ni a. Computer-based studies neihnaah he compound hi mihring taksaa receptor-ah a bei thei a ni tih zir chhuah a ni a, chu chuan hnute tui a ti tam thei tura rin a ni.
Bal nutritional value hi chi thum chips, powdered leh chhuma test a ni a. Hetah hian Bal chhum hi regular taka ei atan a him bakah a chaw tha a awm tih hmuh chhuah a ni a. Bal chhum hi Zemabawk veng chhunga nu hnute tui pe lai mi sawmthum hnenah 100 gram in nitin thla hnih chhung pek a ni. Hemi chhung hian kar tin survey neih ṭhin a ni a, chu tah chuan 57 % in an hnute tui a tipung tih hmuh chhuah a ni a, hnute tui nei ngai lo pathum zingah pakhat in a neih phah bawk a ni.
Tags
News