Hnahthial Post | September 11, 2025, Hnahthial: Vawiin khan Hnahthial Bazar YMA Hall-ah Food Safety Officer, Lunglei, Pu K. Zobiakfela hovin Food Safety Licensing and Registration Camp buatsaih a ni a. License diltu thahnem tak awmin naktuk lamah pawh Hnahthial South lam Chanmari YMA Hall-ah Food Safety Licensing and Registration Camp hi neih chhunzawm a ni ang.
Pu K. Zobiakfela chuan Food Safety and Standards Act, 2006 in a phut angin ei in siam leh zuara sumdawnna kalpui zawng zawngte chuan Food License (Fssai License) an neih ngei a ngaih thu a sawi a. Ei leh in sumdawnna in a kawh chu 'mihring eitur siam leh zawrh chhuah zawng zawng' hi a ni a, eichawp dawr, thingpui dawr, restaurant, café, hotel, guest house, homestay, hostel, caterer, chhang siam, chawhmeh zuar, sa dawr, theitui siam, kawng kama ei leh in dawr siam (street food vendor) zawng zawngte hi a huam vek a ni a ti bawk.
Food License nei lova sumdawnna kalpui chu Section 63 of Food Safety and Standards Act, 2006 bawhchhiatna niin thla ruk chhung lung in tan leh cheng nuai nga thleng chawi theihna a nih thu a sawi a. Kum khat chhunga cheng nuai sawm pahnih hnuai lam lalut te tan fee cheng za an la a, kum khat chhunga cheng nuai sawm pahnih chung lam lalutte chuan fee atan cheng sang hnih an chawi thu a sawi. License la nei lo zawng zawngte chuan he hunah hian license siamtir vek tura ngenin hun remchang hmasa berah license an neih leh neih loh an check leh vek dawn tih a sawi bawk.
Tags
News