Hnahthial Post | September 11, 2025, Aizawl: Pachhunga University College, Mizo Department chuan ni hnih awh tur- ‘Tunhnai Mizo Thu leh Hla Dinhmun : Hawi Lam leh Sukthlek’ (Two Day National Seminar on Understanding Contemporary Mizo Literature : Issues and Concerns) chu an buatsaih a. Khuallian, Mizoram University Registrar, Prof. Lalnundanga chuan New Education Policy (NEP) hnuaiah Mizo tawng a pawimawh tulh tulh tur thu sawiin, “University signboard-ah pawh Mizo tawng telh zel turin UGC-in min nawr a ni,” a ti.
Prof. Lalnundanga chuan Sorkar laipui, Ministry of Education-in tunhma chuan University signboard te chu Hindi leh English-a ziak turin min ti thin a, NEP 2020 a lo chhuah hnu hian mahni hnam bil tawng telh zel tawh tura hrilh kan ni a. Hindi, Mizo leh English-in signboard pawh siam zel a ngai tawh a ni tiin Mizo department leh Mizo tawng hi a pawimawh tulh tulh dawn a ni a ti bawk.
He seminar hi PUC Seminar Hall-ah buatsaih a ni a, hawnna inkhawm hi Dr. Lalnunpuia Renthlei chuan kaihruaiin Principal, Dr. H. Lalthanzara chuan thu a sawi a. PUC chuan hmalam pana kal zel turin theihtawp a chhuah zel thu leh tun dinhmunah hian PUC-ah zirlai 3013 leh thawktu 240 bakah UG department 22 leh PG department 5 a awm thu a tarlang a, NIRF rankingah kum 4 chhung Top 50-ah a lan theih thu a sawi bawk. He seminar-ah hian Prof. KC Lalthlamuani, Head, Department of English and Culture Studies, Mizoram University chuan keynote sawiin Coordinator Dr. Enid H. Lalrammuani leh Mizo Department HoD te chuan thu an sawi a ni.
He seminar-ah hian lehkhabu chhuah chungchang te, Machine translation hmanga Google translate-a Mizo tawng telh chungchang te, Artificial Intelligence-in Mizo thu leh hla a nghawng dan te, Mizo thu leh hlaa LGBTQ chungchang lo lang te, Mizo hlaa mahni nun bunruahna te, Mizo film hmasawnna leh Mizo film-a inbiakna tawngkam lo lang te zir chian a ni dawn a. He zir chiannaah hian Mizoram chhunga mithiam hrang hrang bakah IIT Gandhinagar atang te, University of Bern, Hochschulstrasse, Switzerland atang tein mithiamte an kal khawm a ni.
Tags
News