Hnahthial Post | September 11, 2025, Hnahthial: Vawiin chawhnu dar 1:30 khan DC Conference Hall, Hnahthialah, Hnahthial District AIDS Control Committee buatsaihin Hnahthial District chhung khaw hrang hranga kalpui tur - 'Intensified IEC Campaign, 2025' khuhhawnna hun hman a ni a. District Bawrhsap, Pi K. Vanlalruati chuan HIV/AIDS natna laka an fihlim theih nan kalkhawmte chu nun uluk turin a chah a ni.
Khuallian, District Bawrhsap, Pi K. Vanlalruati chuan HIV/AIDS hi natna hlauhawm tak, inkai chhawn theih leh tih damna damdawi la awm lo a nih thu sawiin inkai chhawn theihna kawng hrang hrang hre chiang a, theih ang tawka nun uluk a tul thu a sawi a. District chhunga HIV/AIDS leh hmeichhiat mipat hman khawloh avanga natna inkai theih chungchang inzirtirna - Intensified IEC Campaign 2025 kalpui theih a ni chu lawmawm a tih thu sawiin he hunah hian kan dinhmun dik tak kan hriat theihna turin HIV/AIDS test kan neih theuh hi a tul hle a ni a ti bawk. Kalkhawmte chu HIV natna hrik an kai loh nan an nun uluk tura chahin kum 2025 atan, Hnahthial District khaw hrang hranga Intensified IEC Campaign kalpui tur chu a hawng a ni.
Inkhawm hi Addl SP, Pu Robert S. Beihrosa chuan kaihruaiin, District AIDS Control Officer, Dr. R. Lalsanglura'n HIV/AIDS Awareness Campaign a nei a. Sub Hqrs YMA President, Pu H. Hmingthanzuala pawhin thu sawiin Govt High School, Govt Higher Secondary School leh FD Higher Secondary School zirlai naupangte an tel a ni.
Tags
News