BCM Biak In, Mamte ‘T’ a chim

Hnahthial Post | September 11, 2025: Vawiin chhun dar 12 bawr vel khan BCM Biak In, Mamte ‘T’ chu a thlang lei a min avangin a chim a, kohhran bungraw pawimawh tam tak a chimpui a ni.

BCM Mamte ‘T’ hi kohhran member 140 vel niin, tuna Biak In chim hi kum 2012 aṭanga rel ṭan niin, kohhranhote’n ṭhahnemngai takin vai mistiri ruai lovin an sa pum a, kum 2024 January ni 5 khan a hawnna leh Pathian hnena hlanna hun hmangin Biak In hi Rev. Dr Lalzarliana, tuna ES Lawngtlai, a hun laia Director, Communication Department & Literature and Printing Department chuan Pathian hnenah hlanin a hawng a ni.

Biak In chim chhan hi a lan danah a thlanga National Highway kawngpui laih zaunin a nghawng a nih hmel a, Rev. Dr Lalzarliana, ES Lawngtlai-in chhiat tawk kohhrante a hmunah enpuiin, khawtlang hruaitute leh sorkar thuneitute nen hma lak chhunzawm dan tur sawiho a ni.

ES Office Lawngtlai aṭangin Rev. Dr Lalzarliana, ES, Pu Fc. Lalhualhima, Production Assistant, Oscar Zaihmingthanga leh K. Lalchamliana te a hmunah kalin, chhiat tawk kohhran ṭanpui nan pawisa fai ₹ 10,000/- leh Silpouline eng emaw zat an hlan a ni.