Hnahthial Post | September 13, 2025, Hnahthial: South Tuipui bialtu MLA, Pu Jeje Lalpekhlua chuan Mizo Zirlai Pawl Headquarters, Hnahthial ten District Level Middle & High School Quiz Competition an buatsaih chu nizan khan BDO Conference Hall-ah khuallian niin a hmanpui a. Quiz Competition-ah hian Presbyterian English School chuan middle school level-ah pakhatna lawmman lain High School level-ah St. Stephen’s School chuan pakhatna lawmman an la a ni.
Khuallian, MLA Pu Jeje Lalpekhlua chuan thu sawiin MZP ten zirlaite hmasawnna atana quiz competition an buatsaih thei chu lawmawm a tih thu leh zirlai te pawhin an hlawkpui ngei a beisei thu a sawi a. Zirna a ni emaw infiamna a ni emaw, kawng dang danga hlawhtling tur chuan thiam ringawt a tawk zo lova, beih hram hramna nun nei chunga thawkrim leh beidawng duh lo apiang an hlawhtling thin a ti.
Zirlaite hmasawnna atan amah pawhin theihtawp a chhuah thu leh zirlai titha chawimawina, MLA Award-te sem thin a nih thu a sawi a. Zirlaite chuan Hnahthial District leh kan ram hmabak an ni tih in hre chunga, theihtawp chhuah a zirna lamah hmasawn zel turin a sawm a ni.
Khuallian chuan Hnahthial District hmasawnna thenkhat a tarlan hnuah Mizoram chhung ringawt a hnathawh kan tum thin hi kan bansan a hun tawh thu a sawi a. Kan rilru-ah Mizoram state pawn mai ni lo, India ram pawn thleng a hnathawk thei tura tan kan lak a tul tawh hle a ni a ti bawk.
Khual zahawm MZP Gen-Hqrs President elect, Dr C Lalremruata, pawhin thusawiin MZP Hqrs Hnahthial-in Quiz Competition 2025 zirlaite tana an buatsaih chu lawmawm a tih thu leh, zirlaite'n Combined Civil Service Examination atana inbuatsaih chhoh nan a hmang turin a chah a, kum tin Matric leh HSSLC Exam Result chhuakah Mizo Zirlai tam takin top 10-ah an inhlang kai thei a nih chuan, Hnahthial District chhunga zirlaite pawhin kan ti thei a ni tiin, theih tawp chhuaha zir turin a chah a; Sawrkar Sikul zirtirtute pawh, Sawrkarin sum tam tak senga a rawihte an nih ang ngeiin, an Class-a zirlai thiam lo ber pawh thiamna pe thei tura Sawrkarin a rin an nih angin, an mawhphurna hlen turin a sawm a ni.
MZP Hqrs Hnahthial President, Pu Jimmy Lalrosanga pawhin thusawiin, Hnahthial District chhunga School hrang hrang Quiz Competition-a lo tel te chungah lawmthu a sawi a. Inelna thianghlim a nih angin, zirlai tin te zirna kawngah inelna thianghlim zawk nei turin a sawm bawk a ni.
He hunah hian PC Lalhlimpuia, Secretary, MZP Hqrs: Hnahthial chuan lawmthu sawina hun a hman bakah MZP Hqrs Hnahthial OB te inhmelhriat tirna a nei a. MZP Hnahthial-in Quiz a buatsaih theih nana sum leh paia ṭanpuitute chungah lawmthu an sawi takzet thu a sawi bawk a ni.
He hunah hian District Bawrhsap Pi K. Vanlalruati; District Education Officer, Pu H. Sangthanga te pawhin thu an sawi a.
Lawmman sem nghal niin;
Middle School Section-ah Presbyterian English School Hnahthial chu pakhatna an ni a, High School Section-ah St. Stephen’s School Hnahthial chu pakhatna an ni bawk.
Tags
News