Hnahthial Post | September 24, 2025, Hnahthial: Rashtriya Poshan Maah, 2025 hmanna kal zelah Hnahthial ICDS Project hnuaia thawkte chuan vawiin khan Hnahthial khaw chhunga office hrang hrang tlawh kualin Signature Campaign an nei a. Child Development Project Officer (CDPO), Pi F.Lalnuntluangi chuan an office kalnaah te hian eitur hrisel leh tha ei pawimawhna a sawi nghal a ni.
CDPO chuan he Signature Campaign hnuaia hming sign chu taksa tana hrisel lo - thil thlum, al, thau leh mawm ei tlem tura intiamna a nih thu sawiin mahni mai ni lo, kan chhungte leh hmelhriatte hnenah eitur hrisel ei pawimawhna inzirtir chhawng zel turin hming sign tute chu a chah nghal a ni.
Signature Campaign hnuaiah hian office hrang hrang a officers leh Staff ten eitur hrisel chauh ei tura intiamna hming an sign a, Poshan Maah pual hian Hnahthial DC, Pi K.Vanlalruati leh PHE Sr. EE, Pu K. Lalkima te chuan thing an phun bawk a ni.
Poshan Maah hi kum 2018 atang khan hman tan niin tun kum, a vawi 8-na hi PM chuan September ni 17 khan a hawng a. POSHAN lampui chu Prime Minister's Overarching Scheme for Holistic Nutrition niin a thil tum ber pakhat chu naupangte hrisel taka an thanlen theih nana ei leh in tur hrisel pek leh chumi pawimawhna inzirtir a ni.
Tags
News