Hnahthial Post | September 24, 2025: Vawiin khan Urban Development & Poverty Alleviation Department Minister Pu K. Sapdanga hovin, Aizawl Sustainable Urban Transport Project (ASUTP) hnuaia hmalaknate leh Temple Square leh Vaivakawn inkar kawng thawm thatna tura ruahmannate sawi hona leh inhrilhhriatna, ‘Sensitization Meeting on Corridor & Junction Improvement Project under ASUTP’ chu Vaivakawn Auditorium-ah neih a ni a. Sports & Youth Services Minister leh Aizawl West - II bialtu ni bawk, Pu Lalnghinglova Hmar pawhin telpuiin UD&PA Secretary Pu Lalmalsawma Pachuau-in meeting hi a kaihruai a. UD&PA leh PWD Department hotute bakah Tuikual, Dinthar, Dawrpui vengthar leh Vaivakawn khawtlang hruaitute he hunah hian an tel a ni.
Thu sawiin Pu K. Sapdanga chuan Aizawl Sustainable Urban Transport Project-in a tum ber chu, Aizawl khawpui a lo nawm zawk theih nan leh traffic zam nasa thinte a lo ziaawm zawk theih nana kawng tih zauh belh te, mipuite him taka an chet vel theih nana kalna nuam, footpath tha leh changkang zawk siamte a nih thu a sawi a. Tun dinhmunah ASUTP hnuaiah hian Temple leh Vaivakawn inkar kawng bakah Bawngkawn leh Kulikawn inkar kawngte thawmthatna tura ruahmanna siam mek a nih thu sawiin, ruahmannate a hlawhtlin thuai theih nan khawtlang hruaitute chu theihtawp lo chhuah ve tur te, kawngpui ti hnawk zawnga lirthei dah thinte vil uluk lehzual turtein a ngen bawk a ni.
Aizawl West - II Bialtu Pu Lalnghinglova Hmar pawhin thu sawiin he project hi mipuite ta, mipuite that tlanna tur a nih avangin thawh hona tha a pawimawh tur thu a sawi a, veng mipuiten theih tawp chhuaha an tawiawm zel a beisei thu a sawi bawk a ni.
Vawiin meetingah hian ASUTP buaipuitura sawrkarin a rawih, Mott Macdonald Consultancy atangin Manish Rege, Team Leader, Project Planning, Design & Management Consultant leh Pu HVL Zarzoenga, Programme Coordinator ten power point hmangin Temple Square leh Vaivakawn inkar kawng (1.87km) tih hmasawnna tura ruahmanna te an tarlang a, ruahman dan tlangpui chu hetiang hi a ni:
• Dinthar veng kawng pengthuam tih zauh (Junction Improvement)
• Temple leh Vaivkawn inkar kea kalna kawng thawmthat (Foothpath & Walkway Marking)
• Step - 22 awmte thawmthat (Imrovement of Staircases)
• Parking Zones leh Bus dinna changtlung zawka siam
• Retaining wall thawmthat ngaite thawmthat.
Vawiin hun hmannaah hian khawtlang hruaitute duhdan leh ngaihdante ngaihthlak niin ruahmanna (DPR) siamnaah an telve theih nan kawng hawnsak an ni. Sensitization Meeting neih zawh a nih hnu hian UD&PA Minister leh SYS Minister-te hian Vaivakawn (chuanhnuai) leh Hunthar veng inkar kawng, Fire & Emergency Services Headquarters bula chhuak chu mipui tam zawk ten, tangkai zawka an hman theih nan, thawmthat theih dan turte enin a hmunah an tlawh nghal bawk a ni.
Tags
News