Hnahthial Post | September, 20, 2025, Aizawl: Pang Zirlai Pawl, Joint Headquarters, Aizawl buatsaih, zirlai tharte lawm luhna leh zirlai tiṭhate lawmpuina hun, vawiin chawhma dar 11:00 am I&PR Auditorium, Treasury Square, Aizawl-a neih chu District Council & Minority Affairs (DC & MA) Minister Pu C. Lalsawivunga chuan khuallian niin a hmanpui a, Pu Malsawmzuala, Chairman, MYC chu Khual zahawm a ni.
Khuallian DC & MA Minister Pu C. Lalsawivunga chuan Mizorama chi bil leh hnam pêng hrang hrang awmte chu Mizo kan nihnain min phuar khâwm zêl se a duh thu sawiin, “In la hrang tham leh inen hrang tham kan awm lo va, hetia inpumkhat leh lungrual taka kan chenho hian hnam a chhiar tham leh hnam zahawm kan nih phah a ni,” a ti a. Hnam anga kan din chhuah theih nan inunauna leh inpumkhatna dah pawimawh a ṭûl thu sawiin, mahni awmna hmun ṭheuhah ram leh hnam chhan nâna theihtawp chhuaha rinawm leh huaisen taka hmalak a ṭûl thu a sawi a. Kal khâwmte chu ram leh hnam intodelh ni tûra ṭan lakpuiah sâwmin, zirlaite chu ram leh hnam tân eng nge ka tih ve theih tih ngaihtuah rân chunga lehkha taima taka zir tûrin a fuih a ni.
Pu C. Lalsawivunga chuan kal khâwmte chu hnathawh hreh nei lo tûr leh thawk lova awlsam taka sum lâk luh tum lo tûra fuihin, mahni zâwn ṭheuhah taima leh rim taka thawk tûr leh a thlâwna dawn leh sem ringawt beisei lo tûrin a chah a. Zirna chu hmasâwnna rahbi pawimawh tak a nih thu sawiin, zirlai kal khawmte chu ram leh hnam tân a ni tih hriaa thiamna tak tak nei tûra lehkha zir a, Central service-ah te tam zawk inziak tling thei tûra ṭan la nasa tûrin a chah bawk a. Tum mumal tak nei chunga lehkha zir tûrte, Christian kan nih angin Pathian ṭih tlat tur leh zu leh ruih theih thil leh mipat hmeichhiatna lakah te fihlim tlat a pawimawh thute nu leh pate chawimawi tur leh thawhrimna hmanga hlawhtlin tum tûr tein a fuih a ni.
He hunah hian MYC Chairman Pu Malsawmzuala pawhin zirlai tithate lawmpuina leh zirlai tharte fuihna thu a sawi a. MZP, MSU leh hnampual hrang hrang hruaitu LSA, MBSA, MSO, HSA, RSU leh SSPP te hnen atangin thusawi ngaihthlak a ni.
PZP Vice President Pu Fellic Zaihmingthanga chuan programme hi kaihruaiin, Rev. C. Ramsangvawra'n hunserh a hmang a, Secretary Pu Joshua Lalvensanga'n inhmelhriattirna hun hmangin Report a pe a ni. Pu Vanlalfakhlua, President leh Pu Albin Lalhruaitluanga, PZP General Headquarters, President te hnên aṭangin thusawi ngaihthlâk a ni bawk.
Tags
News