Hnahthial Post | September 20, 2025, Aizawl: Vawiin chawhma khan Opikpure Pvt. Ltd. leh Mizoram Sawrkar chuan Dr. KC Lalmalsawmzauva, Adviser to Chief Minister pisaah Khuangleng, Champhai District-a Sawhthing sawngbawlna, ’Ginger Processing Unit’ dinna turin thuthlung an ziak a. Pi Pinky Zosangpuii, Joint Secretary, Commerce & Industries Department leh Managing Director, Opikpure Pvt. Ltd. te chuan he thuthlung ah hian an hming an ziah hnan a ni.
Mizoram Sawrkar leh Opikpure Pvt.Ltd. ten thuthlung an siam ah hi Industrial estate hmun, Khuanglengah kum 10 chhung, Sawhthing sawngbawlna din leh kalpuina tur a ni a. Hemi atan hian Opikpure Pvt.Ltd te chuan Industrial Estate ram chu Sawrkar bituk rate angin, man chawiin an luah hawh dawn bakah thawktu za zela sawmnga aia tlem lo chu ram chhung mi an ruai dawn a ni. Tarlan danin an inbunna tur senso hi Cheng Vbc. 2.5 vel a ni a, 2026 kum tir lamah hna thawk tan tura inbun fel hman an tum thu an sawi.
Vawiin MoU sign-na hun ah hian Opikpure Pvt.Ltd. Managing Director chuan an ruahmanna thenkhatte tarlangin, ni zung chakna hmanga sawhthing pho rona tur khawl engemaw zah an hman tur thu a sawi a. Khuanglenga Ginger Processing Plant bun an tum ah hian nikhat ah sawhthing Metric Ton 20 an tih ro theih tur thu a sawi. Organic product, thlai hlo mihring hriselna atan a pawi thei tel lova thar chhuahte chu man man zawka hralh thin a nih avangin he hmalakna hian kuthnathawktute hnen ah Organic farming uar zawka kalpuina a thlen an beisei thu a sawi a. Chutianga thar chhuah thlai te chu Organic Certification an buaipui sak tur thu leh Sawhthing chauh ni lo, thei leh thlai dangte pawh sawngbawl tel an tum thu a sawi. He hmalakna hian thalaite tan eizawnna a siam belh bakah thlai tharte man man zawk a tih ralna a thlen phah an beisei thu an sawi bawk a ni.
MoU sign-na ah hian Special Investment Committee for Agriculture & Allied Sector member Pi Maria CT Zuali, Secretary, Horticulture Department, Pu LP Lalchangkima, Managing Director, ZIDCO, Pi C.Lalnunsiami, Sr. Research Officer leh sawm bik angin Dr. H.Lianzela, Director, Commerce & Industries Department-te an tel a ni.
Tags
News