Hnahthial Post | September 6, 2025, Hnahthial: Nimin khan Moriah Public School, Hnahthial chuan RD Conference Hall, Hnahthialah 'Zirtirtute Ni' ropui takin an hmang.
Moriah Public School-in Zirtirtute Ni an hmanah hian Pu H Sangthanga, DEO Hnahthial chuan khuallian niin a hmanpui a, Dr K Lalzuimawia, Asst.Prof., Gov't Hnahthial College chu khual-zahawm niin, Pu VL Liansanga, Editor, Kailawn Daily Newspaper, MZP Hqrs: Hnahthial leh MSU District Hqrs te chu a bik taka sawm niin hun an hmanpui bawk a ni.
He hunah hian Khuallian Pu Sangthanga chuan thusawiin Moriah Public School-in 'Zirtirtute Ni' an hmanah khuallian atana an sawm chu lawmawm a tih thu sawiin, Zirtirtute chu Pass percentage tih that aia, Zirna Quality Ngai pawimawh thar turin a chah a, Zirlaite pawh Zirtirtute thu awiha zawm turin leh chhawr tlak ngeia zir chhuak turin a fuih bawk a ni.
Khual-zahawm Dr K Lalzuimawia pawhin thusawiin, Moriah Public School-in 'Zirtirtute Ni' an hmanah Khual-zahawm sawm a ni chu lawmawm a tih bakah, zirlaite fuihna thu a sawi a. Zirlaite chu Central leh State Sawrkar hnuaia hna hrang hrangah luh tuma zir turin a fuih a, Mihring kan lo piang a, puitling tura nun kawng kan zawhna ah hian kan nun tanga then hran theih miah loh chu zirna leh zirtirtute hi an ni, tiin zirtirtu hlutna a sawi bawk a ni.
MZP Hnahthial President Pu Jimmy Lalrosanga chuan chawimawi leh ngaihsan tur dik kan hriat a hun thu kalkhawm te hmaah sawiin, kan ngaihsan em em IAS, MCS, Dr, leh a dangte thiamna pe tu, mi zahawma min siamtu Primary atanga University thlenga min zirtirtute hi chawimawi phu leh ngaihsan tur dik chu an nih thu sawiin, zaithiam tak pawhin anmahni zirtirtu mentor an nei a, actor te pawhin trainer an neih ang bawk a, khawvel a kan nuna bet thiamna tak tak quality min neih tirtu kan zirtirtute hi vawiin atang hian i chawimawi ang u, a ti bawk.
Tags
News