Hnahthial Post | September 22, 2025, Aizawl: Kum 2025-2027 chhung atana Mizo Zirlai Pawl(MZP) General Headquarters Office Bearer turten vawiin khan mawhphurhna an la tan.
Vawiin chawhma khan MZP Conference Hall ah MZP General Headquarters OB charge inhlanna hun neih a ni a, kum 2025 atanga 2027 chhung atana hruaitu tur, President, Dr. C. Lalremruata, Vice Pesident, Sanghmingthanga, General Secretary, C. Lalhmingsanga, Asst. General Secretary, Lalentlinga, Treasurer Rothanliana leh Finance Secretary ten charge an la a ni.
MZP President thar Dr. C. Lalremruata chuan thusawiin, zirlai pawl thianghlim tak an neih theih nan Political party kaihhnawihte inrawlh tawh lo turin a ngen a ti a, MZP inthlan neih zawh takah political party leh MLA inrawlh an awm nia sawi chu a zahthlak a, party a awm tawhte chu MZP Election-ah inrawlh tawhlo turin a ngen tih a sawi a, inthlanah ZPM party lineup leh ZPM sponsor awm anga sawi chu thu dik lo a ni tiin, MZP chu zirlai pawl a nih angin, zirna kaihhnawih chu an ngaih pawimawh ber tur a ni dawn a ti a, zirlai harsate tanpuina turin Students Aid Fund siam tum a nih thu a sawi bawk.