DM&R Minister Prof. Lalnilawma’n State Emergency Operation Centre (SEOC) foundation lungphum a phum

Hnahthial Post | September 22, 2025, Aizawl: Vawiin khan DM&R department chuan Mizoram State Emergency Operation Centre(SEOC) foundation lungphum phunna programme E-In-C, P&E Office, Conference Hall-ah a buatsaih a. Hon’ble DM&R Minister Prof.Lalnilawma chuan khuallianin programme hi a hmanpui a, remote control-in(virtual-in) SEOC Foundation lungphum chu a phum a ni.

SEOC hawnna thu sawiin DM&R Minister chuan khuarel chhiatna kan tih hi khuarel a ni chiah em? nge keimahni thlenchawp (man-made) zawk?. Mizoram, a bik takin Aizawl khawpuia khuarel chhiatna thleng tam ber hi, keimahni fimkhur loh avanga kan thlentir (man-made) a ni. Chuvangin leilung chunga kan kutthlak dan hian chhiatrupna thlen kawngah kawngro a su hle tih hre thar i la. Kan bawlhhlawh leh tuichhe paih danah te, kan in sakna tura lei kan laih danah te mitin I fimkhur tlang ang u , tiin kalkhawm te a sawm. Minister Chuan Mizoramah hian chhiatrupna hi a thleng zing ve ta hle mai a, chhiatrupna a lo thlen changa rang taka district hrang hranga DEOC te hmalak dan lo monitor a, State level a ruahmanna siam ngai te lo siamna hmun chu SEOC hi a ni a, a pawimawh hle a ni. SEOC changtlung tak kan han nei mai tur hi ka lawm tak zet a, DM&R Dept. tan thil chuan chhinchhiah tlak a ni, a ti. Minister chuan lirnghinga building dang a lo tluk palh pawhin, SEOC chu a tluk ve a thiang lo tih rilru nena SEOC hi sak tum a ni a, a tha hle tura ngaih a ni, tiin minister chuan Contractor hnenah a tha thei ber anga hna thawk turin a hrilh bawk.

Vawiin programme hi Pu R.Vanrengpuia, Director, DM&R in kaihruaiin, Pu H.Lalnunpuia, Sr.EE, Project Div-I, PWD chuan technical report a pe a. Report a tarlan danin SEOC hi MINECO (Open Gym) bula sak tur niin, a sakna tur sum hi SASCI,2024-2025 atanga hmuh a ni a. Sanctioned Amount ₹18.50 Crore niin, Contract amount hi ₹14.90 crore a ni thung. A sak hna hi Contractor Nidhi Creative Infrastructure, Silchar, Assam ten an thawk dawn a ni. SEOC hi zopa chhiara chhawng 8(G+7) a ni dawn a, a building pumpui zau zawng hi 4138.50 Sqm a ni. He hunah hian Pi K.Lalrinzuali, IAS, Secretary, DM&R pawhin thu a sawi bawk.

Vawiin programme hi Pu VL.Zaithanzama, MLA, Pu K.Lalthawmmawia, Commissioner & Secretary, DP&AR, Pu Vanlaldina Fanai, Commissioner & Secretary, Finance, PWD etc, leh Er.Lalhriatpuia, Aizawl DC bakah sawm bik official thahnem takin an telpui a ni.