Hnahthial Post | September 23, 2025, Serchhip: Hrangturzo Bialtu MLA Pu Lalmuanpuia Punte hmalaknain Friends of People chuan mamawh huna a thlawna an koh theih tur mi thiam Medical Team East Lungdar-ah an dah.
He medical team ah hian Dr Ruth Lalthasangpuii, Nurse Pi Sawmzeli Renthlei, ANM Pi Zothangluangi, Health Supervisor Pu C Lalhruaizela leh lirthei khalhtu tur Pu Lalruatsanga te an tel a. East Lungdar chu hmun puiah an hmang dawn a ni. PHC-in an kawlsa ambulance chhawr tangkaiin khaw hrang hrangah a tulna apiangah an kal kual thin ang.
Serchhip District pum atana koh theih tura ruahmanna siam ni mah se, East Lungdar RD Block an vil deuh ber dawn a. Damdawi pawh damlote mamawhna ang zelin he medical team hian a thlawnin an pe thin dawn a ni. He Medical Team din tura sum mamawh te hi Oil India Ltd. (OIL) ten an CSR Fund atangin an tum ang.
Vawiin khan free medical centre leh free ambulance bultanna hun East Lungdarah neih a ni a, Bialtu MLA Pu Lalmuanpuia Punte aiawhin East Lungdar BDO Pu Peter Malsawmtluanga'n he hun hi a hmanpui. Programme ah hian Friends of the People Director Pu David TT chuan an kalphung tur a sawifiah a ni.
Tags
News