Hnahthial Post | September 23, 2025, Hnahthial: Vawiin khan DC Meeting Hall, Hnahthialah District Bawrhsap, Pi K. Vanlalruati kaihhruaiin Land Committee an thu khawm a. Hetah hian House Pass leh Periodic Patta dilna lut sawmli panga (45) chungchang an ngaihtuah ho a ni.
Meeting kaihruaitu, Bawrhsap chuan Hnahthialah Revenue & Settlement Department hawn a nih tawh thu leh district mipuite mamawhna hrang hrang phuhruk tura theihtawp chhuah a nih thu sawiin tun hnai sorkar order tihchhuah tharah Additional DC, Pu Zothanmawia Khiangte chu Settlement Officer (SO) turin a rawn ruat thu a sawi a. Tun tumah hian House Pass (LSC) dilna panga (5) leh Periodic Patta dilna sawmli (40), a vaia dilna lut sawmli panga (45) ngaihtuah a nih tur thu leh land committee in a pawmpuite hi Directorate of Revenue & Settlement Department lamah an recommend ve leh dawn tih a sawi bawk.
Pi Esther Leihang, Settlement Officer chuan report a pek danin kumin August leh September thla chhungin LSC sawmli (40) an issue tawh thu leh LSC issue tura siamfel tawh sawm pasarih (17) a awm mek thu a sawi a. House Pass pathum (3) leh Periodic Patta sawm hnih pasarih (27) issue an nih thu a sawi bawk a ni.
Tax leh Non Tax atangin cheng 1,86,756 an lakluh chu Directorate-ah chhunluh a ni tawh a, tunah hian Hnahthial-ah tax khawn thei turin training neih mek a nih tawh bakah Hnahthial District Revenue Office hawng tura hmalak mek a nih thu a sawi bawk.
He hunah hian Revenue, Forest, PWD, PHE department aiawh te, Hnahthial khawpui chhunga Village Council President te, NGO aiawh te, Political Party hrang hrang aiawh te leh Prominent Citizen te an tel a ni.
Tags
News