P&E Minister Pu F Rodingliana'n Mizoram khawtlang lam Power lakluhna leh pek chhawnna hmunpui siam mek a tlawh

Hnahthial Post | September 11, 2025, Aizawl: Nimin (10 September, 2025) khan Power & Electricity Department Minister Pu F. Rodingliana chuan Mizoram khawthlang lam Power lakluh leh pekchhawnna tih changtlunna tur North Eastern Region Power System Improvement Project (NERPSIP) hnuaia hna thawh mek 132/33kV Sub-Station West Phaileng ami leh 132/33kV Sub-Station Marpara ami te chu a tlawh a. Heng Sub-Station hawn thuai a nih theih nan hmabak la awm te a hmun ah a enpui.

Minister Pu F. Rodingliana hian Phaileng Sub-Station-ah hian hnathawktu, Powergrid-te nen inkawmin hmalakna hrang hrangte kalpui dan te a sawipui a. Mizoram khawthlang lamin Power Supply hnianghnar zawka an neih theihnan heng Sub-Station-te siam zawh thuai dan turte leh Mizoram Sorkar kuta hlan vat a nih theih dan turte a sawipui a ni.

Minister hian Mizoram-in he 132 kV Sub-Station hi tangkai leh hlawk zawka a hman theih dan tur leh harsatna awm te sutkian dan tur ruahmanna a siam pui a. 132/33kV Marpara Sub-Station leh 132/33kV West Phaileng Sub-Station sak hna hi September 2018 khan bultan a ni a, mimal compensation leh forest clearance lama harsatna awm avangin hun bituk chhunga zawh hman a ni ta lo a. Tun hnaiah Mizoram Sorkar hmalaknain Forest Clearance atan cheng Nuai 189.71 chu Forest Department-ah pein hnathawh chhunzawm a lo ni ta a ni. Tun dinhmunah hian Sub-Station sak hna leh Transmission line thlun hnate zawh vek tawh niin 33kV level-a test charge tawh a ni a, 132kV level-a test charge leh tur hian Regional Load Dispatch Centre (RLDC)-ah First Time Charging (FTC) phalna nghah mek a ni.

West Phaileng Sub-Station bikah hian Side Drain leh RCC kawng bakah Transit Camp siam hna tih loh chu hnathawh zawh vek tawh a ni a, heng la zawh loh te pawh hi September, 2025-ah chuan zawh fel beisei a ni. Marpara Sub-Station ah hian Switchyard panna kawng siam hna te, side drain, Transit Camp building, Security Haat bakah gate siam hna te thawh mek a ni a, March, 2026-ah chuan heng zawng zawng hi zawh fel vek beisei a ni.

Power Minister hi Er. Laltlanthanga Chief Engineer (Distribution), Er. C. Vanlalsawma, SE, Er. Jacob Lalrinnunga, EE, Mamit leh Pu Samuel Lalhriatzuala, SDO, West Phaileng ten tawiawmin, Powergrid atangin General Manager a lo kal bawk a ni.