Hnahthial Post | September 10, 2025, Lunglei: Vawiin khan Mizoram sawrkara School Education Minister Dr Vanlalthlana chuan Lunglei Deputy Commissioner (Bawrhsap) hma laknaa buatsaih, Mizoram zirna ina vansang chanchin zirna hmun bik - Cosmic Class (Astronomy Lab) hmasa ber leh Lunglei District leh Lungsen Aspirational Block-a zirna tihhmasawnna tura hma lakna hrang hrang a hawng.
Education Minister Dr Vanlalthlana chuan Government Leitlangpui High School, Lungleia Cosmic Classroom chu a hmunah hawngin, Lungsen Higher Secondary School leh Govt Middle School, Tlabunga Cosmic Classroom-te chu ral aṭangin (virtual mode-in) a hawng thung a. Lunglei DEO Conference Hall-a inkhawm buatsaihah Lunglei District leh Lungsen Aspirational Block huam chhunga zirna tihhmasawnna tur ruahmanna hrang hrang – Learning Bridges [a laklawha zirna bansan (dropout)-te’n zirna an chhunzawm leh theihna tura hma lakna] te, Book Nest Initiative [thingtlang zirlaite tana zirlaibu leh thawnthu bu hlui khawn khawm] te, English Language Foundation [primary sikul thlan bika zirlaite tana English bulṭhut zirna] te, Project Period Pride [hmeichhe zirlai naupangte zinga hmeichhe hun bi kaihhnawih hriselna leh thianghlimna (menstrual health & hygiene) chungchanga hma lakna] leh Money Wise [sum hman leh enkawl dan inzirtirna (financial literacy)] te a hawng bawk a. A laklawha zirna chawlhsan naupangte hnenah sikul an kai leh theih nan thirsakawr (bicycle) semin, Book Nest Initiative hnuaia lehkhabu sem turte a dawngtute kutah a hlan a. Sawrkar high school leh higher secondary school zinga HSLC & HSSLC (Science) Exam Centre-te hnenah Science practical exam changtlung zawka kalpui a nih theih nan Directorate of School Education aṭanga Science Lab Equipment ṭangkai tur leh mamawh chi hrang hrang chu Khuallian hian a sem bawk.
He hunah hian Lunglei HPC Vice Chairman & Lunglei North MLA Pu V. Malsawmtluanga, Lunglei South MLA Pu Lalramliana Papuia, Lunglei West MLA Pu T. Lalhlimpuia leh LMC Chairman Pu Lalzuithanga leh councillor-te bakah, sawrkar official-te, zirtirtute, tlawmngai pawl ai awhte, khawtlang leh kohhran hruaitute, political party hruaitute, media leh zirlaite an tel.
Khuallian Dr Vanlalthlana chuan Lunglei District-a zirna tihhmasawnna tur leh zirlaite chawi kanna atana Lunglei Bawrhsap leh Education Department te hma lakna leh thawh hona chu chhuanawm a tih thu sawiin, National Education Policy 2020 leh State sawrkarin zirna kawnga hmasawnna tura hmathlir a neih tihhlawhtlinna pakhat a nih thu a sawi a. Cosmic Class (Astronomy Lab) chu a awmna sikul bakah, sikul dangte pawhin ṭangkai taka an hman a beisei thu sawiin, hma lakna hrang hrang chu Lunglei District-a zirnaa a ṭha zawnga danglamna thlentu a nih a beisei thu a sawi a. Zirna chu khawtlang tana hnawksak lo leh ṭangkai zawk ni tura mihring chhertu, vantlang tana hahdamna leh hahchawlhna thlentu a nih thu sawiin, zirna kawnga hmasawn nan sawrkar bakah, tlawmngai pawl, sumdawng leh mi tin thawh ho a pawimawh thu a sawi.
School Education Minister Dr Vanlalthlana chuan SCERT hnuaiah kumin 3rd term aṭangin Mizoram chhunga sikul pawl 3 aṭanga pawl 8 chinah zawhna inang tlang hmang tura ruahman mek a nih thu sawiin, zirlaite'n chik zawka thil an ngaihtuah thiam nan leh zawhna an zawh thiam theih nan exam zawhnaah thuziak dah chhuah hmanga zawhna siam te pawh tihtel tum a nih thu a sawi a. Sum enkawl dan inzirtirna (financial literacy) pawh zirlaia telh turin SCERT kal tlangin hma lak a ni dawn tih sawiin, zirlaite'n thiamna nghet leh tluantling an neih theih nan an hriat dan puan chhuahna leh tar lanna, presentation kalpui uar a ṭul thu a sawi a. Harsatna leh hlawhchhamna kara ding ṭang ṭangte'n hlawhtlinna an chang ṭhin tih sawiin, tum ruhna leh taimakna nei tura zirlaite cho chhuak ṭhin turin zirtirtute a fuih.
Bawrhsap Pi Navneet Mann chuan hma lakna tur hawn takte kal tlang chuan zirlaibu zir thiam bakah, zirlaite'n a taka tawn hriat an neih hmanga hma an sawn theih nan te, hriselna, sum enkawl thiamna leh mi puitling ni tura thil pawimawh hrang hrang an zir theih nan te huap zau taka hma lak chhoh a nih tur thu a sawi a. Hma lakna hlawhtlin nan department leh zirna inte bakah, mipuite thawhpuina leh ṭawiawmna a ngen.
Lunglei District Education Officer Pu Micky R. Lalenkawla'n hun kaihruaiin, hun hman chhan hma lakna hrang hrang a sawi fiah a. Rev. Lalremsiama Ralte (BCM Electric Pastor Bial, Lunglei) chuan hunserh hmangin, Govt High School Lunglei Pipe Band, Govt Leitlangpui HS leh Govt Leitlangpui HSS te'n rimawi leh zaiin kal khawmte an awi a. Additional DC Pi Zoramdini'n lawm thu sawiin hun a khar.
Vawiina hawn tak, Cosmic Class hi zirlaite'n ni, thla, arsi leh van thengreng chanchin a lem hmuh leh khawih theih nena an zir theih nana Astronomy Lab atana pindan (classroom) cheibawl niin, Lunglei District Bawrhsap bul tumin, School Education Department, Lunglei leh AstroScape, New Delhi te nen ṭang tlanga buatsaih a ni a. Mizorama Astronomy Lab hmasa ber atan Lunglei District chhung hmun pathum - Lunglei, Lungsen (Aspirational Block) leh Tlabungah te dah a ni a. Hemi atana classroom cheibawl hna hi AstroScope chuan thawkin, hmanrua chi hrang hrang - telescope lian ṭha tak bakah, astronomy leh science zirna hmanraw hrang hrang hi a thlawn vekin an chhawpsak a. AstroScape neitupa Aryan Mishra hi van thengreng lam zirna lama mi hratkhawkheng, kum 14 mi lek a nih laia arsi keh them (asteroid) hmu chhuak tawh niin, India rama thingtlang sikul 320 chuangah Astronomy Lab (Cosmic Class) hi an siam tawh a ni.
Learning Bridges hma lakna hnuaiah hian naupang sikul kal rual sikul kal tawh lo (Out of School Children & Drop Out)-te'n zirna an chhunzawm leh theih nan anmahni zawn chhuah hna ngawrh zawka kalpui tum niin, mi tu pawhin OoSC naupang an hriatte awlsam zawka thuneitute hnena an hriattir theih nan QR Code siam a ni a. QR Code scan hnuah google form-ah lutin, an hming, veng leh chanchin chhut luh hnuah theh luh tur niin, hei hi Lunglei DC Office aṭangin vil reng a ni dawn a. Learning Bridges kalpui meka OoSC hriat chhuah tawh mi 33 zinga sikul lut leh ta hmeichhe naupangte hnenah Disha Foundation te pek thirsakawr (bicycle) chu vawiin khan sem nghal niin, thirsakawr sem hi kalpui zel tum a ni bawk.
Lungsen Aspirational Block huam chhunga thingtlang khua leh hmun kilkhawr zawka awm naupangte'n zirlaibu leh lehkhabu ṭha chhiar tur an neih theih nan Book Nest Initiative hnuaiah Lunglei DC kaihhruaiin Lunglei Sub-Headquarters YMA hnuaia Branch YMA-te, UD&PA leh SHG-te nen Lunglei khawpui chhungah lehkhabu khawn khawm mek a ni a. He'ng lehkhabute hi Lungsen Aspirational Block-a sikul hrang hrangah sem a ni ang.
Lungsen Aspirational Block huam chhunga primary school zirlaite leh zirtirtute'n Sapṭawng (English) bulṭhut nal taka an thiam theih nan Lunglei DC Office chuan Education Department leh Disha Foundation te nen English Language Foundation (ELF) kalpui mekin, primary school 10-ah hma lak phawt a ni a. Disha Foundation aṭanga dawn zirna hmanraw chi hrang hrang - teaching aids, workbook leh video hmangin zirtirtute'n an sikulah ṭheuh zirtirin, kumin October thla hian endikna (test) pawh buatsaih tura ruahman a ni.
Project Period Pride hnuaiah hian zirlaite zingah hmeichhiate'n thla tin hun bi (period) an neih chungchanga thianghlim leh hrisel zawka inenkawl dan tur inzirtirna kalpui a ni dawn a. Money Wise (Financial Literacy Programme) hi Lunglei DC, Education Department, Lead Bank Office, SBI, MRB, MCAB, SDO (C) Tlabung leh BDO Lungsen te nen ṭang hova hma lakna niin, hemi kal tlang hian Lunglei District chhunga zirlaite'n sum leh pai hman dan leh enkawl dan an thiam theih nan inzirtirna kalpui a ni ang.
Tags
News