Hnahthial Post | September 1, 2025, Thenzawl: Vawiin khan Thenzawla Village Councils, NGOs, leh khawtlang mipui tangrual chuan Thenzawl Peace City lawmna inkhawm Jt. YMA Hall, Bazar Vengah an buatsaih a, bialtu MLA, Pu Lalduhoma, Chief Minister chu khuallian niin, Pu B. Lalchhanzova, Supply Minister chu khualzahawm a ni.
Thusawiin Chief Minister chuan, kan ram hian khawpui changkang leh tunlai, fel taka duan sa, kan mamawh ve tawh a. Thenzawl hi chutiang din nan chuan a rem hle. Chief Minister ka nih hnuah Prime Minister nena kan inhmuh tum hnihnaah khan Pu Narendra Modi hian ka nunkawng te min zawt a, Pi Indira Gandhi nena kan thawh dun dan te, IPS hna ka bansan chhan te, MP zinga Anti Defection Law hmanga paih hmasak ber ka nih chhan te chu Mizoram buaina a lo reh a, muanna a lo awm theih nana ka thiam ang anga ka beih vena vang a nih thute ka hrilh ve a ni. A hnenah hian, "Hei, Mizoramin remna kan nei ta a, India rama inremna hlawhtling ber zinga mi niin, state ralmuang ber kan lo ni ta a. Planned City kan nei bawk si lo va, mipui nuaih sawm chen theihna tur Peace City min pe rawh tiin ka dil ta a ni", a ti. He khawpui hi Aizawl sawn tumna a ni lo va, chutiang zawngin kan sawi ngai lo, Mizoramin khawpui mawi leh changkang tak kan neih ve theih nan khawpui thar din kan tum zawk a, Thenzawl tan bik pawh a ni lo va, Mizoram tan a ni, a ti.
Master Plan siamna chauh min la pe a, a taka hmalakna tur hi kan la ngaihtuah zel ang. 15th Finance Commission sum chuang bang, Prime Minister kuta awm mek chu dil kan rilruk mek.
Kan hriat angin tun thla ni 13 ah Sairang rel station hi Prime Minister-in a rawn hawng dawn a. Peace City lungphum pawh a rawn phun theih kan beisei mek. Rel kawng hian Thenzawl Peace City hi thleng phei thuai se kan duh avangin hma kan la mek bawk, tiin Thenzawl Peace City tobul leh hmachhawpte a tarlang a. A taka kan thawh hunah insenghawi a la tul nasa dawn a, mipuiten inhawng taka kan lo dawnsawn a ngai dawn a ni, tiin mipuite inbuatsaih turin a chah a ni.
Khualzahawm Pu B. Lalchhanzova, Supply Minister, Thenzawl khaw pa ni bawk pawhin thusawiin, Thenzawl hi hman atang tawhin khawpui a la nih tur thu mi tam takin an lo sawi tawh thin. Chu hun chu a takin a lo thleng dawn hnai ta a. Mipuite kan hlimin kan lawm hle. Thenzawl hi Bengkhuaia lal ram chhunga awm niin khawper a lo siam thinna a ni. Mary Winchester chung thua British sorkar aiawh TH Lewin nena Saui an tanna pawh tuna Thenzawl thlanmualah hian a ni, Peace City dinna hmun atan pawh a inhmeh hle a ni, a ti.
Pu C. Lalnunthara, President, Vantawng Group YMA chuan Thenzawl mipui aiawhin lawmthu a sawi a. Kan bialtu MLA leh Chief Minister-in Thenzawla khawpui changkang, Peace City din tura hma a laknaah hian kan lawm a, kan phur a, mipuiten a lawmna hun neih hi kan chak a, thukhat vuain he hun hi kan buatsaih ta a ni, a ti.
Inkhawm hi Pu B. Lalrinliana, Chairman, Thenzawl Jt. VC chuan a kaihruai a, Rev. Lalchhuanga'n hunserh a hmang a, khawtlang mipui an kal tha hle.
Press Release hmanga kan lo puan tawh thin angin Pu Lalduhoma hian Chief Minister a nih hnua New Delhi a zin vawi hnihnaah khan Thenzawl Peace City dinna tur hi India Prime Minister Pu Narendra Modi hnenah a dil a. A hnu reiloteah a dilna ang hian Central sorkar chuan Thenzawla mipui nuaih sawm vel khawsak theihna tur khawpui changkang, kilometer 108 thuta zau Master Plan siam a rawn phalsak a. Ministry of Housing & Urban Affairs kaltlangin Master Plan siamna tur hi cheng vaibelchhe sawm (Rs. 10 Cr.) a rawn pe a ni.
Master Plan siam hna hi chak taka bawhzui nghal a ni a. July ni 22 khan a siamtu tur zawnna hmahruai Request for Proposal for selection of Consultant tihchhuah niin company lian tak tak sawm leh pariatten an rawn ngaihven a. Ruahman anga thil a kal chuan tun thlaah hian a thawktu tur hi thlan fel hman beisei a ni.
Tags
News