Hnahthial Post | September 4, 2025, Aizawl: Pu C. Zonunmawia, Hnahthial ziak 'Zaikung Suakpuivungi' tih lehkhabu chu nimin (4 Sept, 2025) chhun dar 12:00 khan Adviser to CM Pu Lalmuanpuia Punte in a pisa-ah tlangzarh.
Tlangzarhtu Pu Muanpuia Punte chuan, Mizo faten zai hmingthang tak tak kan neih zingah a hmingputu tute mahin a chanchin an la ziah ngai loh avanga kan hriat ngai loh Suakpuivungi chanchin leh a hla te chhui zauna ziak a dah hi a ropuiin a lawmawm hle a, Zofa, thangthar leh zirlaite tan an hriatna ti zautu tangkai tak a nih a beisei thu a sawi.
Muanpuia chuan thu leh hla hi a pawimawh hle a. Mizo Union lo lar chuahna leh chakna chhan ber pakhat pawh kha an thu leh hla kha niin a sawi a. Mizo history a indo lar tak Chhim leh Hmar Indo pawh kha hla thu an inphuah elna ațanga lo chhuak a ni ber a ti.
He hun hi Sinlung Hills Council member Lalvenhima Hmar-in kaihruaiin, Mizo novelist lar tak Pu C Lalnunchanga (Taitea) chuan lehkhabu thlirlawkna a nei.
Suakpuivungi hi Darsuakpuii a ni a, Sailo hnama ni. Khawruhlian Lal chhungkaw zinga mi ni a sawi a ni a. Mizo pi pu nun leh sakhaw thar innawk lai vel a mi a ni a hla ah pawh hmuh tur tam tak a awm.
Suakpuivungi hi Upa Vanlalvuana a nu in a hrilh dan chuan nu ngo sen vul mai tituai nalh tak mawng er tauh mai zaithiam leh lamthiam tak a ni an ti.
Tlabung lamah hian pasal nei a zuk awm nge a nih a, a nuthlawi hnu a zuk awm tih hriat a har deuh a Denlung pa Bawihleta Vai zinin nupuiah a rawn hawn ta a ni.
Suakpuivungi hian Denlung tlang hi a ngaina hle a, Hnamtini phumna bul ami pawh Suakpuivungi Tuikhur lui tih a ni an ti bawk. Kristian ni ve ta lo zu hmun a cheng ta fo chu pa ho nen pawh an inchul nel lo thei lo a, pa ho a tih lawm thluah avangin mi chhungkua chawh buaina chin a awm fo avangin Saihnuna hian a zan a zanin hnawtchhuak a, pa ho pawhin hnuk ulh meuhin a nthlah a ni awm e.
Zan khat chauh Hnahthialah zuk riakin hetiang Bahra khur tia lekah ka tawm reng peih lo tiin Denlungah bawk a kir leh a, hlain a chhilh zui a. "Tu ma'n thai bilah mi hel lo u, Pathlawi leh valnema chhai ka nuâm zawk e, An sawi vanram aia nuam zawk chu" a la ti ham ham mai tih hi ti ti a tling viau thin reng a ni. A hla bu hi Mizo folk song lar tak niin Kut ni vangthla-ah chuan a hla tel lo hian Mizo te Kut hi a famkim zo ta lo a ni ber mai awm e.
Tags
News