Chief Minister-in Shillong Branch MHIP Silver Jubilee hmanpui

Hnahthial Post | October 30, 2025, Aizawl: Vawiin khan MHIP Shillong Branch te chuan NEC Auditorium-ah an branch Silver Jubilee an lawm a. Chief Minister Pu Lalduhoma chuan khuallian niin a hmanpui a, Pi Baryl Vanneihsangi, MLA chu khualzahawm a ni.

Chief Minister hian MHIP member te lawmpuina hlanin, Shillong Branch MHIP chu Zofa, Shillong-a khawsa leh zirlaite, damlote tan an tangkai thin a. Mi tam tak tan malsawmna a lo ni tawh thin. Shillong-ah MHIP Branch a awm tih kan hriat ringawt pawhin kan thla a muang a, hna tam tak thawk lo va in inhriat lai hian mi tam takin kan thlamuanpui che u a ni, a ti.

State pawn lama Mizo awmte hi Mizoram aiawhtute in ni a, miten an hmuh dan che u hi Mizo mipuite an hmuh dan a ni nghal zel a. Chuvang chuan, tlema han zilh leh han zirtir ngai an awm pawhin lo zilh hreh lo ula, YMA nena tang tlangin kan ram leh hnam hmel timawi lo thei lakah leh khawtlang nun siam that kawngah in lo tang tlang zel dawn nia. Tin, Meghalaya-a awm Zohnahthlak sorkar hnathawkte leh kan DRC te nen kawng engkimah lo thawkho tha ula. Zofate huikhawm hna in lo kalpui zel dawn nia, tiin a chah a. Mizoram tana MHIP hnathawh ropui tak takte a tarlan bakah Mizoram sorkarin a hmasa ber atana hmeichhe Cabinet Minister a neih thu a tarlang a ni.

Pi Baryl Vanneihsangi pawhin thusawiin, Shillong Branch MHIP te lawmpuina a hlan a, Shillong leh Meghalaya state khawsa zofate tana rawngbawlna tha tak tak an lo kalpui tawhnaah lawmthu hrilhin an kal zelna turah duhsakna a hlan a ni.

Silver Jubilee lawmna inkhawmah hian Pi Lalhmingliani, President pawhin thu a sawi a, Pi Laldawngliani Chhangte, Secretary chuan report a pe a. Tunah hian member 375 vel an awm mek a, member fee la pe lo enge maw zat an la awm niin sawi a ni.